Ministru Administrasaun Estatál, Jorge da Conceição Teme, partisipa iha Loron Nasoens Unidas ba Servisu Públiku no serimónia entrega Prémiu Nasoens Unidas ba Servisu Públiku, ne’ebé organiza hosi ONU iha Bahrain, iha loron  24 to’o 27 fulan Juñu.

Objetivu prinsipál hosi konferénsia ida ne’e mak atu fasilita tranferénsia inovasaun ne’ebé maka identifika hosi LDC’s, (Least Developed Countries), ne’ebé uza sistema kolaborativu governasaun iha nível hotu-hotu iha instituisaun Governu nian, atu bele hala’o no fasilita servisu sira hotu hodi atinje DMGs (Millenium Development Goal).

Jorge da Conceição Teme, hateten katak, iha Delegasaun ne’ebé nia dirije konsege halo aprezentasaun ida ho títulu “Papel atendimentu sektór públiku atu alkansa objetivu dezenvolvimentu milenium iha pós ajenda dezenvolvimentu 2015 bazeia ba kontestu Timor-Leste”. Iha forum ne’e, nia koa’lia kona-ba implementasaun MDGs, ne’ebé Governu Timor-Leste harii iha Batugadé, Aileu, Baukau no fatin sira seluk no mós kona-ba implementasaun projetu pilotu PNDS iha suku 30 iha distritu 5 nia laran. Planu ne’e atu kobre suku 442 iha tinan oin mai, kona-ba programa integradu distritál ninian ne’ebé implementa, tuir loos uluk iha PDD I no PDD II no iha tinan ida ne’e ita hanaran PDID ne’ebé distritu balun assina tiha ona.

Ministru ne’e mós hatutan tán katak, ho partisipasaun iha konferénsia internasionál ne’e maka Timor-Leste hatudu nia-an, bele koa’lia no bele mós aprezenta ideia konstrutiva sira ne’ebé nasaun sira seluk bele apresia.

Aleinde ne’e, Ministru partisipa mós iha diskusaun meza redonda, “lori governu Timor-Leste nia naran hato’o ba ONU ka forum katak, Timor-Leste maski nasuan ne’ebé foin hetan independénsia tinan 11, tuir realidade ami enfrenta duni difikuldade maibé ami ladun preokupa kona-ba osan, ami preokupa liu kona-ba oinsá ami bele dezenvolve ami-nia rekursu umanu”.

Partisipa iha forum ne’e nasaun hamutuk atus ida resin no partisipante besik rihun ida resin.