Ministériu Komérsiu, Indústria no Ambiente liu hosi Sekretáriu Estadu Indústria no Kooperativa, Filipus Pereira, taka Formasaun Téknika Indústria Nuu-Kulit, iha suku Mehara, Lospalos, durante loron sanulu resin rua, hahú iha loron 04 to’o loron 15, fulan Juñu.

Sekretária Estadu Indústria no Kooperativa (SEIK), fó ona apoiu ba mákina dulas nu’u-kulit no dulas mina-nu’u, ba Indústria Timoli hodi prodúz mina-nu’u no halo nu’u-kulit sai utíl, liuliu, ba komunidade sira iha Lospalos no mós ba povu nasaun ne’e tomak.

Filipus Pereira, iha serimónia enserramentu, husu ba formandu sira atu kontinua haburas kriativadade iha indústria ki’ik ne’e, hodi hahú kontribui ba dezenvolvimentu ekonomia nasaun nian, tanba, tuir nia, dezenvolvimentu iha nasaun ne’e, bele la’o ba oin bainhira timor-oan tomak iha espíritu kriatividade, inisiativa no inovativa ne’ebé maka’as tebes.

Filipus Pereira, fó hanoin ba formandu sira, “Governu sei kontinua fó apoiu no akompaña atu atividade ida ne’e hetan rezultadu ne’ebé di’ak liu. Governu hakarak atu iha tinan ne’e, atividade indústria sira bele halo produsaun di’ak liu, hodi labele dependente liu ba reseita petrolíferu nian”.

Diretór Indústria Timoli,  Joanico Jerônimo,  haktuir, “ Kompañia Timoli, durante ne’e produz mina nuu (virgin coconut oil) ne’ebé uza hodi halo sabaun no fa’an ona mós iha merkadu internasionál balun”.

Iha serimónia enseramentu ne’e, formandu sira halo demonstrasaun téknika prodúz nuu-kulit ne’ebé sira aprende durante loron hirak ne’e. Sira mós agradese tebetebes ba apoiu ida ne’e, tanba bele fó koñesimentu no esperiénsia di’ak ba sira, liuhosi Diretór Timoli.