Sekretaria Estadu Seguransa (SES), hamutuk ho Sekretaria Estadu Promosaun Igualdade (SEPI), hala’o treinamentu kona-ba divulgasaun informasaun kona-ba Jéneru ba membru Polisia Nasionál Timor-Leste (PNTL) sira, funsionáriu sira husi Diresaun Nasionál Seguransa Edifísiu Públiku (DNSEP) no membru Bombeiros nian sira, iha subdistritu Vikeke, durante loron rua, hahú loron 20-21, fulan Juñu, ho nia tema “Hamutuk hasa’e konsiénsia hodi kombate violénsia doméstika no haburas armonizasaun iha Família no Sosiedade”.

Diretór Nasionál ba Protesaun Sivil (DNPS), Domingos Pinto, nu’udar reprezentante husi Sekretaria Estadu Seguransa, hato’o nia perspetiva katak “husi formasaun ne’e membru PNTL sira bele hetan informasaun ne’ebé kle’an liután kona-ba iguldade jéneru nune’e bele haluan sira ninia koñesimentu kona-ba implementasaun programa ne’e nian iha sosiedade no atu sira rasik bele hadook-an husi violénsia doméstika iha sira nia família rasik”.

Reprezentante Sekretaria Estadu Promosaun Igualdade, Maria Filomena Babo Martins, ne’ebé hanesan mós Formadór ba programa jéneru haktuir katak, Planu Asaun Nasionál Kontra Violénsia Dméstika nian, bazeia ba jéneru, mai husi lei kontra violénsia doméstika iha Artigu 14. “Ho baze ba iha artigu ne’e, ita bele halo planu asaun nasionál ida, ne’ebé mak involve ministériu hotu-hotu, hodi bele kombate hasoru violénsia bazeia ba jéneru no mós violénsia doméstika”.