Governu Timor-Leste, liuhosi ninia Sekretaria Estadu ba Apoiu no Promosaun Sektór Privadu, servisu hamutuk ho Governu Xina nian, organiza jantar ida hodi komemora aniversáriu ba da-10 kriasaun Forum Macau nian ba kooperasaun entre Xina ho país hirak Ko’alia Lian Portugés nian, iha área ekonomia no komérsiu. Jantar ne’e hala’o iha Areia Branca, Kristu Rei, Dili, iha loron 30 fulan Juñu 2013.

Sekretária Estadu ba Apoiu no Promosaun Sektór Privadu, Veneranda Lemos, iha ninia diskursu, hateten: “Timor-Leste prontu ona atu partisipa no kontribui ba konferénsia ministeriál oin mai, ne’ebé sei hala’o iha tinan ida ne’e. Timor Leste hanesan nasaun foun ida, ne’ebé sei dezenvolve hela nia-an, mak Governu konsidera Forum Makau ne’e, la’os de’it hanesan mekanizmu kooperasaun komplementár ida importante atu implementa polítika hirak ne’ebé mak trasa tiha ona, liu-liu kona-ba promosaun iha ita nia relasaun ekonómika no komersiál, maibé mós hanesan instrumentu importante ida ba ita nia interkámbiu kulturál no edukativu, hodi la’o tuir dalan unidade no komprensaun ba malun, atu nune’e it abele atinji ona iha dékada primeiru ne’e, rezultadu hirak notável no ita mós bele hetan ona rezultadu hirak kona-ba matéria kooperasaun iha área formasaun rekursu umanu nian sira”.

Sekretária Estadu dehan tan katak, Sentru Formasaun Forum Makau, mak nu’udar lalenok no mós mekanizmu ida di’ak tebes ba reforsa kapasitasaun kuadru timor-oan sira nian iha nível nasionál. Timor-leste nu’udar país foun ida, nia presiza tebtebes apoiu iha kapasitasaun iha ninia rekursu umanu sira atu halo Timor Leste sai nu’udar país ida ne’ebé bele sai fatin ba investimentu Rejiaun Ázia Pasífika nian. Importante mós formasaun hirak espesífiku ne’ebé refere hosi Governu Xina nian kona-ba sentru formasaun Forum Makau nian, iha aspektu ida ne’e.

Iha okaziaun ida ne’e, Veneranda Lemos mós agradese Forum Makau, liu-liu ba Sekretáriu Permanente tanba ninia empeñu no dedikasaun ne’ebé mak hatudu ona ninia ezisténsia durante primeira dékada, hanesan Forum no nia hala’o ona dezenvolvimentu komun hodi hadi’a ita nia povu sira nia moris.

Hosi sorin seluk, Sekretariu Jerál Forum Makau nian, Chang Hexi, ko’alia: “Makau to’o oras ne’e dezempeña hela ninia knaar iha kooperasaun ekonómika no komersiál entre Xina no País hirak ne’ebé ko’alia Lian Portugés, hanesan ponte no ligasaun ida ne’ebé labele substitui, ida ne’e halo Makau sai nu’udar plataforma importante ida iha kooperasaun ne’e. Hau hein katak, konvidadu hirak ne’ebé marka prezensa iha serimónia ne’e, bele tau matan nafatin no fo apoiu hodi dezenvolve Forum Makau, hodi partisipa nafatin iha atividade sira, nune’e mós fó sujestaun no kosellu atu hadi’a sai di’ak liután ita nia servisu sira”.

Partisipa iha jantar komemorasaun ne’e, Prezidente Parlamentu Nasionál, Vicente Guterres no membru parlamentu nian balun, Sekretária Estadu ba Apoiu no Promosaum Sektór Privadu, Veneranda Lemos, Embaixadór Júlio Morais, nu’udar reprezentante Ministra Finansa Kabu-Verde, reprezentante Ministra Ekonomia Guiné Bissau, Sekretáriu Jerál Forun Makau nian hamutuk ho ninia komitiva, Korpu Diplomátiku no Xefe Delegasaun País Ko’alia Lian Portugés nian sira.