Ministru Dionísio Babo Soares,  loron 24 fulan Juñu 2013, hala’o sorumutu  ho  reprezentante Governu Japaun nian,  Jepang International Cooperation Agency (JICA), Kenta Komatsu, ho objetivu atu ko’alia kona-ba kriasaun proposta Lei Jerál Mediasaun nian iha Timor-Leste, iha Miinistéru Justisa Dili.

Hafoin sorumutu, Ministru Justisa, Dionísio Babo Soares, esplika, “durante fulan hirak ne’e Ministériu Justisa liuhosi Diresaun Lejizlasaun nian, halo’o servisu hamutuk ho ekipa JICA hodi ajuda hakerek lei kona-ba asuntu mediasaun. Daudaun ne’e ita hakarak prepara Lei Tradisionál maibé ita mós  presiza Lei Mediasaun atu hodi rezolve kazu sivíl sira, oinsá ita bele hasés tiha hosi tribunál, purezemplu, hanesan kazu  ema hadau malun ba rai no hadau malun ba sasán kona-ba familía nian”.

Ministru Justisa hatutan tán, “Lei ida ne’e importante tebtébes tanba bainhira hetan ona aprovasaun, sei fasilita mós justisa ba komunidade ne’ebé presiza justisa, tanba iha ona estandar mekanizmu ida ne’ebé ema hotuhotu bele uza hodi rezolve kazu sivíl. Ekipa husi instituisaun kooperasaun Japaun nian liuhosi JICA, sei haruka péritu ida mai servisu hamutuk ho Diresaun Lejizlasaun hodi prepara hamutuk proposta Lei, maibé ita sei halo konsulta ho entidade sira ne’ebé relevante, purezemplu Tribunál no Prokuradoria Jerál sira hodi haree atu labele iha konflitu ho Lei sira ne’ebé iha ona Timor-Leste bainhira aplika lei ne’e. Tuir planu, proposta Lei ne’e sei halo iha tinan ne’e nia laran. Ita hakarak atu iha proposta Lei ne’ebé di’ak no reprezentativu, la’ós kópia de’it husi rai seluk lori mai, maibé tenke tuir realidade iha Timor-Leste. Ita presiza halo semináriu ida hodi halo konsulta públika ba ema hotu bele fó sira nia opiniaun”, tenik Dionísio Babo.

Reprezentante Governu Japaun nian, Kenta Komatsu, hatete katak, “ninia objetivu mai iha Timor-Leste liuliu iha Diresaun Lejizlasaun Ministériu Justisa, atu koopera hamutuk hodi kria esbosu Lei Mediasaun. Japaun mós iha Lei mediasaun maibé sira seidauk hatene oinsá atu implementa iha Timor, tuir nia realidade rasik. Ami iha planu atu hasoru malun ho doadór no ONG sira ne’ebé servisu iha área hanesan hodi prepara esbosu Lei ne’e iha Timor-Leste”, hatutan Kenta Komatsu.