Governu Timor-Leste, liu hosi Ministériu Finansas hala’o sorumutu ho Parseria Dezenvolvimentu sira ho tema “Operasionaliza Planu Estratéjiku Dezenvolvimentu ba Rezultadu ne’ebé Efektivu”. Sorumutu ne’e hala’o iha loron 19 to’o 20 fulan Juñu 2013, iha Sentru Konvensaun Dili.
Primeiru-Ministru, Kay Rala Xanana Gusmão, iha ninia alokusaun hateten katak “V Governu Konstitusionál fó sai tiha ona, ba tinan 5 ninia mandatu, liña jerál sira atu implementa Planu Estratejiku Dezenvolvimentu, nebé mós sei motiva dezenvolvimentu actividade sira seluk nian, hodi reduz gradualmente to’o halakon duni kiak, iha mediu prazu”.
Kay Rala Xanana Gusmão subliña liután katak, Timor-Leste hakarak investe iha nia partisipasaun foun, iha sistema internasionál, liu-liu atu tama ba nível sira seluk ba debate ka ba desizaun iha ámbitu multilaterál, no mós fó kontributu ativu ba hadi’ak polítika internasionál sira kona-ba apoiu no ba iha rezolusaun konflitu sira, liu hosi forum diálogu hanesan ‘g7+’, ne’ebé ho orgullo tebes Timor-Leste lidera daudauk. Ami mós hatene katak inflasaun mak sei sai dezafiu permanente ida ba ami-nia kresimentu ekonomiku, kresimentu nebé sei husu investimentu publiku boot tebes duni.
Iha fatin hanesan, Prezidente Repúblika, Taur Matan Ruak hateten “Pozitivu tebes haree metas hosi dezenvolvimentu miléniu nian iha ita-nia metodolojia komum. Embora iha nasaun barak, inklui mós Timor-Leste, objetivu hosi rezultadu sira bele mós la alkansa totalmente, ida ne’e la’os impeditivu atu ita avansa to’o 2015, iha dalan ba nia konkretizasaun no ha’u fiar katak iha serbisu sira hosi reuniaun ida ne’e sei fó kontribuisaun importante atu ajuda ita manan dezafiu foun sira ne’e, no mós profundamentu hosi ita-nia serbisu konjuntu sira sei kontribui atu ita bele atinje lalais ita-nia objetivu sira”.
Sorumutu ne’e hetan rezultadu dokumentu ida ne’ebé hetan apoiu hosi partisipante sira ho títulu “Kompromisu atu Operasionaliza Planu Estratéjiku Dezenvolvimentu”.
Atu hetan asesu ba Komunikadu Imprensa Portavós Governu kona-ba sorumutu ne’e, hanehan iha ne’e.