………………………………………………………………………………………………………………
Díli, Loron 14 Fulan Juñu Tinan 2013
Komunikadu Imprensa
Sorumutu Estraordináriu Konsellu Ministru, loron 14 fulan Juñu 2013
Governu hala’o sorumutu estraordináriu iha loron ohin, Sexta-Feira 14 Juñu 2013, iha Sala Nobre Ministériu Negósiu Estranjeiru no Kooperasaun nian, iha Dili, no aprova ona:
1. Rezolusaun Governu ne’ebé mak aprova Kriasaun Komisaun Eventual ida atu analiza prosesu Sosa Kilat ba Polísia Nasionál Timor-Leste hosi Kompañia Indonézia PT PINDAD (PERSERO)
Hari Komisaun Eventual ne’e atu bele garante manutensaun ba objektivu Planu Estratéjiku Dezenvolvimentu (PED) 2011-2030, ne’ebé mak hakarak atu harii polísia profisionál, ho orientasaun tuir prinsípiu hirak kona-ba boa governasaun no transparénsia institusionál, importante tebtebes ba dezenvolvimentu sektór seguransa nian.
Medida ida ne’e, mosu hafoin iha sujestaun hosi Parlamentu Nasionál ne’ebé hato’o ba Sua Eselénsia Primeiru-Ministru kona-ba atu harii komisaun ida hodi investiga prosesu sosa kilat ba PNTL.
2. Dekretu-Lei ne’ebé mak estabelese Períodu Estraodináriu ba Komandu PNTL nian
Períodu tranzitóriu ne’ebé harii atu hala’o rejime promosaun PNTL nian hotu tiha ona. Governu konsidera katak manutensaun ba Komando Jerál PNTL nian ne’e pozitivu ba Instituisaun no ba País, tanba to’o oras ne’e kontribui duni ba dezenvolvimentu ierarkia nian, ne’ebé bazeia ba postu hirak ne’ebé estabelese ona hosi rejime promosaun nian, no tuir prinsípiu no objektivu hirak trasa tiha ona ba forsa polisiál ida metin no estruturada hodi bele asegura populasaun nia moris di’ak.
Períodu estraordináriu ba Komando PNTL nian ne’e ramata iha loron 27 Marsu 2015.
3. Dekretu-Lei ne’ebé estabelese kriasaun Komisaun Akompañamentu, Fiskalizasaun no Supervizaun PNTL nian
Tanba períodu tranzitóriu to’o ona nia rohan, no Komisaun Akompañamentu Prosesu Promosaun (KAPP) mos hotu ona, maka presiza atu harii fali Komisaun foun ida, iha nível Ministeriál, hodi responsabiliza ba seguransa rai laran nian
Bainhira ita hanoin fali katak iha tinan 2009, IV Governu Konstitusionál harii tiha ona KAPP iha PNTL nia laran, atu bele ajuda Instituisaun ne’e bele implementa promosaun no ajuda atu hetan solusaun ba dezafiu hirak ne’ebé mosu iha tempu nebá. Bainhira KAPP ramata ona mak presiza atu harii Komisaun Akompañamentu, Fiskalizasaun no Supervizaun PNTL nian, ne’ebé mak permanente, atu bele kontinua, ho forma koordenada, hala’o prosesu dezenvolvimentu Instituisaun ne’e nian.
4. Pakote Fiskál ba Orsamentu Jerál Estadu nian ba tinan 2014
Governu aprova tiha ona limite hirak másimu ba despeza nian (Envolope Fiskál) atu bele elabora Orsamentu Jerál Estadu (OJE) nian ba tinan finanseiru 2014.
Pakote Fiskál ba tinan oin mai nian determina tiha ona, hodi haree ba Faktór Fundamentál haat: Planu Estratéjiku Dezenvolvimentu (PED) no Programa Governu nian; ezekusaun Orsamentál; Inflasaun; no Sustentabilidade Fiskál.
Elaborasaun OJE ba tinan 2014 ne’e sei la’o tuir intensaun V Governu Konstitusionál nian, no hakerek iha PED, atu dezenvolve rekursus umanu sira, dezenvolve infra-estrutura sira, hametin Instituisaun sira no kumpri Objektivu hosi Dezenvolvimentu Miléniu no Akordu Foun.