Ministériu Komérsiu Indústria no Ambiénte liuhosi Sekretáriu  Estadu  Indústria no kooperativa, Filipus Nino Pereira, no Sekretáriu  Estadu  Komérsiu,  Ricardo Cardoso Nheu, iha loron 25 fulan Maiu, hala’o  vizita ba Kooperativa  Produsaun Sabaun Aifunan Bahu, Baucau no Produsaun Sabaun Fini, iha Lautem.

Iha vizita ne’e Sekretáriu Estadu Indústria no Kooperativa, Filipus Nino Pereira, hateten, “Governu sei fó asisténsia téknika ba produtór sira ne’ebé produz sabaun, tanba produtu sira ne’e bele hamorin naran di’ak Timor-Leste nian iha rai li’ur.  Ba oin, ita hakarak kontinua promove kreatividade Timor-oan sira nian iha atividade Indústria no komérsiu, atu nune’e Timor-Leste bele koñesidu ho nia produtu orgániku no naturál, ne’ebé fó ba progresu ekonomia nian”.

Iha fatin hanesan Sekretáriu Estadu Komérsiu, Ricardo Cardoso Nheu, enkoraja produtór sira atu mantein sira nia produsaun orgánika, tanba ne’e Sekretáriu Estadu Komérsiu  sei buka atu koordena ho merkadu nasionál no Internasionál atu promove fa’an produtu ne’e.

Grupu Produsaun Aifunan Bahu, Baucau, fa’an ona nia produtu sabaun iha compañia aviaun sivíl Cathay Pacific ka aviaun iha país aziátiku nia laran.