………………………………………………………………………………………………………………
Díli, Loron 11 Fulan Juñu Tinan 2013
Komunikadu Imprensa
Sorumutu Konsellu Ministru loron 11 fulan Juñu 2013
Konsellu Ministru hala’o sorumutu iha loron 11 fulan Juñu tinan 2013, Tersa-feira, iha sala sorumutu Konsellu Ministru nian, iha Palásiu Governu, Dili no aprova ona:
1. Projetu Mapeamentu Topográfiku Timor-Leste nian
Konsellu Ministru konsidera importante kriasaun sistema teknolójiku ida kona-ba mapeamentu totál territóriu nasionál. Mapa topográfiku ne’e sai fundamentál atu planeia projetu iha setór oioin, hanesan rekursu naturál, indústria, infra-estrutura, distribuisaun demográfika, ambiente no seluk tan.
2. Impréstimu husi Banku Mundiál ba Projetu Reabilitasaun Estrada
Reabilitasaun Estrada ne’ebé liga Dili ba Ainaro, importante tebes ba dezenvolvimentu ekonómiku nasaun nian, sei finansia ho tulun husi impréstimu ida husi Banku Mundiál, hodi reflete buat ne’ebé aprova ona iha Orsamentu Jerál Estadu tinan 2013, husi Parlamentu Nasionál.
3. Kontratu FreeBalance ba tinan 2013
Kontratu ho FreeBalance Inc .(ne’ebé apoia Sistema Informasaun kona-ba Jestaun Finanseira no solusaun informátika sira ba Timor-Leste husi tinan 2000) renova fali ona ba tinan ne’e.
Renovasaun kontempla ajustamentu sira ba projetu ne’ebé prevee ona iha Planu Estratéjiku Dezenvolvimentu no projetu Desentralizasaun Administrativa ne’ebé prevee ba tinan ne’e. Nune’e, aleinde Sistema Informasaun no Jestaun Finanseira, FreeBalance Inc sei dezenvolve adaptasaun informátika sira ne’ebé maka presiza ba implementasaun Projetu Dezentralizasaun Administrativa, no fó mós formasaun ba responsável ministeriál sira kona-ba modelu foun sira ne’e.
Konsellu Ministru analiza mós:
1. Estragu hirak ne’ebé mosu tanba udan boot iha Baukau, Vikeke no Manufahi
Iha loron 6 fulan Juñu foin lalais ne’e, udan boot tau maka’as iha zona Lorosa’e Timor-Leste nian, afeta liuliu Baukau, Vikeke no Manufahi. Udan no anin boot halo nível bee mota nian sa’e iha Baukau no Watulari, hodi kauza estragu materiál ne’ebé maka’as ba propriedade sira ne’ebé iha besik mota ibun.
Ekipa distritál sira husi Komisaun Dezastre nian, kompostu husi elementu sira husi PNTL no F-FDTL, ne’ebé responde kedas ba situasaun emerjénsia nian ne’e, hodi fó apoiu ba evakuasaun populasaun ne’ebé iha risku nia laran. Saúde Distritál nian mós fó asisténsia médika no husi parte Bombeirus sira nian fó apoiu bee moos. Iha loron 7 fulan Juñu, Ministra Solidariedade Sosiál, akompaña husi ninia Vise Ministru, vizita zona afetada sira ne’e, no loron ne’e kedas fahe kedas ajuda umanitária ba família vítima sira husi udan boot ne’e. Ekipa interministeriál ida, komposta husi Ministériu Solidariedade Sosiál no Secretaria Estadu ba Polítika kona-ba Formasaun Profisionál no Empregu kontinua fó apoiu iha fatin hirak ne’ebé afetadu.