Ministro de Estado e da Presidência do Conselho de Ministros e

Porta-voz Oficial do Governo de Timor-Leste

Díli, 13 de Junho de 2013

Timor-Leste agradese ba Sekretáriu-Jerál Ban Ki-moon tanba nomeia Dra. Noeleen Heyzer nu’udar ninia Konselleira Espesiál ba Timor-Leste

Iha loron 7 fulan Juñu tinan 2013, Sekrtáriu-Jerál Nasoins Unidas, Ban Ki-moon, hakerek ba Primeiru-Ministru Timor-Leste, Sua Exelénsia Kay Rala Xanana Gusmão, hodi konfirma nomeasaun Dra. Noeleen Heyzer nu’udar ninia Konselleira Espesiál ba Timor-Leste. Objetivu jerál husi nomeasaun ne’e mak atu fó apoiu ba Konsolidasaun Pás, Konstrusaun Estadu no dezenvolvimentu sustentável iha Timor-Leste.

Sekretáriu-Jerál konfirma mós, manuntensaun apoiu konsertadu husi Nasoins Unidas ba prinsípiu sira Akordu Foun nian, nune’e mós asisténsia ba lideransa Timor-Leste nian iha g7+. Ida ne’e hanesan ba dala uluk ne’ebé Nasoins Unidas implementa modalidade inovadora ida ne’e, hodi nomeia Konselleira Espesiál ida atu apoia dezenvolvimentu.

Maske la hela metin, Konselleira Espesiál ne’e sei asegura ligasaun direta ida entre Timor-Leste no Gabinete Sekretáriu-Jerál ONU-nian. Dra. Heyzer sei halo serbisu iha kolaborasaun ne’ebé besik ho lideransa Timor-Leste iha ajenda dezenvolvimentu nian, iha nível lokál, nasionál no rejionál.

Modelu “ONU-País” konsideradu hanesan konseitu inovadór no ezemplár ida atu promove dezenvolvimentu sosiál no ekonómiku iha setór transversál sira, iha tempu ne’ebé hanesan liga nasaun ne’e ho sistema sira ONU-nian, iha nível lokál, rejionál no globál.

Dra. Noeleen Heyzer sei akumula funsaun nu’udar Konselleira Espesiál ba Timor-Leste ho ninia funsaun atuál nu’udar Sekretária Ezekutiva Komisaun Ekonómika no Sosiál ba Ázia-Pasífiku (ESCAP). Ho kareira ne’ebé iha susesu di’ak, iha dékada tolu nia laran, iha área dezenvolvimentu nian, hodi lidera organizasaun nu’udar Subsekretária-Jerál, Dra. Heyzler hetan konvite husi Timor-Leste atu foka ninia esforsu sira, iha área prinsipál tolu entre atividade sira seluk.

Ba dala uluk, atu tulun Timor-Leste hadi’a lalais, kompeténsia no edukasaun rekursu umanu sira hamutuk ho instituisaun hirak ne’ebé mak importante iha rejiaun laran; liuliu, tenke liga kriasaun empregu ho oportunidade ba empregu nian ba foin-sa’e sira, atu sira ne’e bele partisipa lalais liután iha dezenvolvimentu no iha konstrusaun nasaun nian. Ba daruak, atu promove Timor-Leste iha Rejiaun Ázia-Pasífiku nian, hodi fó oportunidade atu fahe koñesimentu no fahe esperiénsia entre setór tranzversál sira, no habelar programa sosiál, ekonómiku no dezenvolvimentu nian sira atu bele fó benefísiu ba povu Timor-Leste. Ikus liu, ba datoluk, tulun Timor-Leste iha preparasaun ba adezaun no tama iha ASEAN.

Dra. Noelen Heyzer sei halo ninia viajen ofisiál ba dala uluk ba Timor-Leste atu partisipa iha Sorumutu Perseiru Dezenvolvimentu Timor-Leste nian sira (RPDTL), ne’ebé sei hala’o iha semana datoluk fulan Juñu nian. Iha enkontru internasionál ida ne’e, Konselleira Espesiál foun ba Dezenvolvimentu sei aprezenta ninia funsaun no liga funsaun ne’e ho mekanizmu dezenvolvimentu Nasoins Unidas nian. Nia sei hahú mós planemanetu estratéjiku kona-ba integrasaun husi ninia funsaun nu’udar Konselleira ba Dezenvolvimentu, hodi prevee ona sorumutu lubun ida ho interveniente sira husi setór oinoin, no mós intervensaun prinsipál ida.

Agio Pereira konsidera katak “Naoins Unidas merese ita nia parabens tanba fleksibilidade atu simu solisitasaun husi ita nia nasaun. Ita agradese mós ba Sua Exelénsia Ban Ki-moon, tanba ninia matenek no nia kompriensaun kle’an kona-ba oportunidade ne’ebé modelu inovadór servisu nian ne’e reprezenta.Ita mós sente orgullu tebetebes tanba Dra. Heyzer halo parte iha ita nia ekipa, atubele dezenvolve servisu ida kona-ba dezenvolvimentu sustentadu no integrasaun rejionál ba longu prazu. Ita hato’o boas-vindas ba Dra. Noeleen Heyzer no ba modelu foun ida ne’e, nu’udar abordajen foun ida ba dezenvolvimentu”.