Governu Timor-Leste

Primeiru-Ministru, Kay Rala Xanana Gusmão, iha loron 30 fulan Maiu inaugura ponte foun Komoro nian, subdistritu Dom Aleixo, distritu Dili, ho nia luan metru 7 no naruk metru 183.

Primeiru-Ministru, Kay Rala Xanana Gusmão iha nia diskursu hateten, “maluk sira hotu, ita hotu kontente tanba ita rezolve tiha problema ida iha ponte Komoro. Hau apresia tebes-tebes  servisu hosi Consorsio Nasional Timorense (CNT) no Kompañia Wika, hau hakarak mós  husu nafatin ba CNT, esforsu -an para ikus mai bele kaer obra sira ne’e mesak.

Primeiru-Ministru informa tan, “ hosi komunidade mós dala barak lakohi servisu, tuur iha televizaun oin hodi fuma, ita nia maluk indonésia sira mak kaer servisu, hanesan ne’e, ita nunka la’o ba oin, ha’u ko’alia nune’e tanba bainhira ita hakarak atu kaer mesak servisu, ita tenke aprende ho laran, lae, ita susar”.

“Momentu kompañia Wika hala’o obra ne’e, iha tempu ne’ebé badak liu tanba foin daudauk ne’e ho udan ne’ebé maka’as, ho bee ne’ebé maka’as sira konsege halo nafatin servisu. Agora ita aproveita bailoron ne’ebé atu tama mai ne’e daudauk  hodi hahú hadi’a kedas ponte sorin. Ita hadi’a neineik para haree fali fatin seluk tanba ita presiza duni atu la’o ba oin se lae ita susar. Ha’u husu ba Wika atu bele servisu maka’as, ha’u husu ba CNT atu loron ruma ha’u mai hakarak haree imi iha ne’e, ha’u husu ba komunidade Komoro atu buka servisu ho didi’ak, ne’ebé ita presiza book-an hodi bele partisipa ho laran”.

Prezidente CNT Jorge Serano, esplika mós, ”mezmu obra ne’e seidauk pursentu 100 ita mak kaer, ho parseria, ita halo ona buat ruma katak bandeira timoroan nian komesa hamriik no ha’u hanoin katak maluk sira balun mós sei hadia-an. Hanesan timoroan ita hotu tenke halo buat ruma ba ita nia rain”.