Iha loron 27 fulan Maiu 2013, Sekretria Estadu Desentralizasaun Administrativa (SEDA) assina akordu ho Universidade Nasionál Timor-Leste (UNTL), Institutu Siénsia Sosiál no Polítika hosi Universidade Lisboa nian no mós Governu Lokál Viktoria, Austrália, kona-ba jestaun administrativa, planeamentu, aprovizionamentu, avaliasaun, implementasaun, liu-liu kona-ba administrativa munisipiu nian.

Sekretáriu Estadu Desentralizasaun Administrativa, Tomás Cabral, hateten katak, objetivu hosi akordu ida ne’e atu prepara kuadru funsionáriu estadu sira hodi haruka ba distritu bainhira estabeleseú munisípiu. Ida ne’e maka kooperasaun rua importante tebetebes, ida atu hanorin ema no ida fali hosi Austrália ba diretamente kedas komunidade, projetu prepartivu ba munisípiu.

Sekretáriu Estadu ne’e mós hatutan tan, “Uluk Austrália sira mai hanesan sidade amiga de’it maibé ohin ita legaliza ba Governu lokál. Governu lokál liu hosi AUSAID, sira sei ajuda poder lokál iha Timor-Leste, tanba ne’e maka kooperasaun ida ho Austrália ne’e importante tebetebes. Sira sei fó tulun iha  preparativu ho Governu lokál, sei forma mós ema. Ita bele haruka ema ba Austrália aprende Inglés. Sira bele ajuda fó formasaun no sira mós iha projetu komunitáriu sira ne’ebé sei implementa ba komunidade sira iha terrenu”.

Iha fatin hanesan, Reitór Universidade Nasionál Timor-Leste nian, Aurélio Guterres, hateten, “formasaun ne’e espesífiku liu ba ema sira ne’ebé mak atu servisu iha munisípiu. UNTL hamutuk ho Universidade Tékniku Lisboa nian mak sei responde ba nesesidade munisípiu nian liu-liu kona-ba preparasaun. Iha kestaun sira hanesan investigasaun balun ne’e la’o hanesan babain; maibé importante liu-liu maka oinsá atu prepara pesoál munisípiu nian ne’e bainhira munisípiu harii karik pelumenus ema prontu ona para atu hala’o servisu iha terrenu”.

Marka prezensa iha eventu ne’e Sekretáriu Estadu Desentralizasaun Administrativa, Tomás Cabral, Reitór Universidade Nasionál Timor-Leste nian, Aurélio Guterres, Embaixadór Portugál nian iha Timor-Leste, Manuel Gonçalves de Jesus, Embaixadór Austrália nian, Miles Armitage, komitiva hosi Institutu Siénsias Sosiál no Polítika hosi Universidade Lisboa nian no mós komitiva hosi Governu Lokál Viktoria, Austrália.