Primeiru-Ministru, Kay Rala Xanana Gusmão, iha loron 21, fulan Maiu hala’o divulgasaun ba projetu implementasaun Polítika Desentralizasaun Administrativa no Podér Lokál ba dasanuluk resin rua, iha distritu Manatutu durante loron rua, hahú loron 21-22, fulan Maiu ho tema,”Tempu Deskansa Hotu Ona, Hadeer, Hamrik, Kaer Liman La’o Ba oin” iha Distritu Manatutu.

Administradór distritu Manatutu hateten katak, “atu harii Munisípiu presiza iha preparasaun rekursu umanu sira sufisiente atu koloka iha servisu sira Munisípiu nian; maibé presiza reflete mós ba kondisaun jegráfika distritu nian. Haree mós kona- ba poténsia oinsá bele iha ninia reseita rasik. Distritu ne’e iha poténsia boot  iha setór agrikultura, tanba área ba agrikultura luan tebtebes. Aleinde agrikultura distritu ne’e iha mós poténsia ba setór turízmu, setór komérsiu no indústria no iha setór privadu mós tinantinan sempre aumenta nafatin, karik nia prontu ona atu tama ba iha Munisípiu”.

Primeiru-Ministru iha ninia intervensaun hateten, “Ha’u fó parabéns ba Asosiasaun Klibur Manatutu Anan, ba manuál ne’ebé imi prodúz. Ha’u fiar katak, buat balu sei sai di’ak, maski seidauk kompletu maibé ita bele hadi’a. Ha’u husu ba Manatutu Anan sira tenki tau iha ita ninia objetivu uluk liu, mak hamenus ki’ak no mukit iha distritu nia laran. Tanba ne’e, Klibur Manatutu Anan tenki prepara-an di’ak liután atu bainhira Munisípiu tama mai iha ne’e, ita iha ona modelu ida ne’ebé ajustadu ba ita nia realidade sósiu-ekonómiku, kulturál no nune’e loron ida ita nia povu bele sai husi móris ki’ak no mukit. Ida ne’e mak objetivu boot tebtébes ba desentralizasaun.

Xefe Governu ne’e esplika liután, “munisipalidade signifika atu lori Governu besik liu mai povu. Agora ita hotu mai hamutuk hodi buka kompriende kona-ba Munisípiu. Ha’u mós kompriende katak bainhira kompara ho munisipalidade Portugál ho Austrália  nian, ita seidauk bele to’o iha nebá tanba prosesu ne’e ita foin atu hahú no fiar katak, loron ida ita sei sai hanesan mós rai sira ne’ebé amk dezenvolvidu tiha ona. Ohin loron ita buka hakaat, faze no etapa atu hodi ba to’o iha ne’ebá, tambasá mak ita presiza  buat sira ne’e hotu, tanba ita nia  kontestu sosiál, ekonómiku no kulturál seidauk hanesan no mós tanba ita iha nivél  kraik.

Distritu Manatutu ho ninia luan 1.706 km², subdistritu 6 (Manatutu, Laleia, Lakló, Laklubar, Soibada no Natarbora), suku hamutuk 29 no totál abitantes, 41.200. Distritu ne’e kompostu husi subdistritu 6 (Manatuto, Laleia, Laklubar, Soibada no Natarbora. Limite fronteira husi Distritu ne’e ho Distritu Baukau, Vikeke, Aileu no Manufahi no ninia klima moderadu, ne’ebé kontribui barak hodi habokor rai. Atividade prinsipál sira iha área dezenvolvimentu ekonomia nian mak hanesan, agrikultura subsisténsia, iha propriedade sira familia nian, haki’ak animál sira, arroz, no turizmu (iha kosta norte), pezka, petróliu no gás (iha kosta sul).