Vise-Primeiru-Ministru vizita Portu Dili, iha loron 27 fulan Marsu, atu halo verifikasaun, iha fatin ne’e, servisu fiskalizasaun nian, ne’ebé foin lalais ne’e Diresaun Nasionál Alfándega, husi Ministériu Finansa dezenvolve ona. Fernando La Sama de Araújo akompoñadu husi Ministru Transporte no Komunikasaun, Pedro Lay, no Vise-Ministra Finansa, Santina Cardoso.

Komitiva governu nian ne’e, iha oportunidade atu haree kontentór barak ne’ebé funsionáriu Diresaun Nasionál Alfándega nian sira prende tiha ona no hein hela investigasaun husi parte autoridade kompetente sira.

Vise-Primeiru-Ministru hatete katak “Parte sira ne’ebé envolve iha prosesu ne’e nia laran tenke hetan investigasaun, no karik iha funsionáriu públiku sira mak sai hanesan suspeitu hodi kolabora ilegalidade ida ne’e, tenke sujeita ba konsekuénsia sira ne’ebé iha, liu-liu lakon estatutu nu’udar Funsionáriu Públiku. Nune’e mós ho empreza sira ne’ebé suspeita ba falsifikasaun dokumentu, karik hetan duni prova kona-ba ilegalidade ida-ne’e tenke simu konsekuénsia. Hotu-hotu tenkesér kumpre Lei.

Vise-Ministra Finansa, Santina Cardoso, hatutan katak prende ona mós kareta 50 “ne’ebé dadaun ne’e, husik hela iha Portu, tanba ninia na’in lakohi atu simu responsabilidade. Situasaun ida hanesan ne’e tenke hetan revista tanba iha Portu la iha fatin atu rai tipu materiál ho dimensaun boot sira hanesan ne’e”.