Ministériu Justisa, liuhosi Ministru Dionísio Babo, halo ofisialmente lansamentu kampaña mobilizasaun ba Rejistu Moris Labarik ho idade tinan 0-5. Labarik sira ne’ebé mak foin moris tenei ba halo rejistu iha Ministériu Justisa liuhosi Diresaun Nasionál Rejistu Notariadu (DNRN) nian atu bele hetan sertidaun RDTL nu’udar Sidadaun Timor-Leste. Lansamentu ne’e hala’o iha Sábadu loron 12 fulan Abril 2013, iha edifísiu DNRN distritu Kovalima.

Ministru Justisa, Dionísio Babo, iha ninia diskursu hateten katak “Lansamentu kona-ba kampaña mobilizasaun rejistu moris ba ita nia povu iha país ida ne’e, liuliu ba labarik ho idade 0-5 ne’e, importante tebes hodi marka istória foun ida ba ita nia rai, tanba bele fó rekoñesimentu ba labarik sira ne’ebé foin mak moris mai bele sai hanesan sidadaun Timor-Leste ne’ebé iha ona sertidaun RDTL”.

“Ha’u fó parabens ba ita hotu, liuliu organizasaun internasionál hanesan UNICEF nomós ba Ministériu Saúde, Ministériu Edukasaun, ne’ebé sempre fó apoiu másimu ba programa ida ne’e. Ohin hanesan lansamentu dahuluk kona-ba kampaña mobilizasaun rejistu moris ba labarik sira, husu ba komunidade liuliu inan-feton sira iha territóriu Timor-Leste tomak katak, bainhira tuur-ahi liu loron 20-30 tenke halo kedas rejistu moris nian iha sentru saúde, no mós iha Diresaun Notariadu ne’ebé agora daudaun estabelese ona iha distritu hotu-hotu”.

Diretóra Nasionál Rejistu Notariadu, Maria do Rosário de Araújo, iha ninia diskursu hateten katak “ohin loron 12 fulan Abril loron ne’ebé importante tanba ita halo ona  lansamentu no realiza programa ne’e iha distritu Kovalima, ho nune’e ita sei hatutan kampaña mobilizasaun rejistu moris nian ba mós komunidade tomak iha sub-distritu 64 iha Timor nia laran tomak.