Primeiru-Ministru, Kay Rala Xanana Gusmão, sei halo vizita ofisiál ida ba Reinu Tailândia iha loron 25 to’o 29 fulan Abril nia laran.

Iha Reinu Tailândia, Primeiru-Ministru, sei hala’o sorumutu bilaterál ida ho ninia omóloga, Yingluck Shinawatra. Iha loron ne’e duni, Xanana Gusmão hetan mós konvite onra ba jantár ofisiál ida ne’ebé oferese husi Primeira-Ministra tailandéza, sei marka mós prezensa iha serimónia ne’e ministru tailandés balun, embaixadór sira ASEAN nian no reprezentante setór privadu sira.

Iha loron ikus vizita ofisiál nian, Primeiru-Ministru sei partisipa iha sesaun ba-dala 69a Komisaun Ekonómika no Sosiál Nasoens Unidas nian ba Ásia no Pacífiko (UNESCAP).

Ministru Edukasaun, Bendito Freitas, akompaña Primeiru-Ministru iha vizita ofisiál ne’e no nia sei hasoru malu ho estudante timoroan sira besik atus ida iha Reinu Tailândia.

Halo parte mós iha komitiva Primeiru-Ministru nian ne’e Ministra Finansas, Emília Pires, Ministru Turizmu, Francisco Kabualdi Lay, no Sekretáriu Estadu ba Asunto ASEAN, Roberto Soares.