Primeiru-Ministru, Kay Rala Xanana Gusmão, iha Sesta-Feira, loron 12 fulan Abril tinan 2013, hala’o vizita ba distritu Kovalima atu halo divulgasaun datoluk nian ba Projetu Implementasaun Desentralizasaun Administrativa no Podér Lokál.
Primeiru-Ministru hatete, “Husu ba Povu distritu Kovalima tomak, juventude, veteranus no mós setór privadu sira atu tau interese nasionál nian liu buat hotu hodi dezenvolve imi nia rai no imi nia distritu rasik. Imi intelektuál sira distritu Kovalima nian, tenke hamutuk sai ema ida de’it hodi deskuti kona-ba povu Kovalima nia problema, tanba iha futuru oin ma,i imi Kovalima oan sira maka tenke rezolve imi nia problema rasik. Importante maka kaer metin Unidade no iha hanoin ida de’it, no hakarak ida de’it”.
Administradór distritu Kovalima nian, Inácio da Silva Pires, hatete katak “Kovalima kompostu hosi Subdistritu hitu, Suku tolunulu; área ne’ebé maka potensiál tebes iha distritu maka hanesan rekursu minerál sira. Atu implementa município, setór hothotu iha distritu Kovalima nian tenke prontu ona hodi implementa, rekursu umanu sira, jestaun administrasaun no planeamentu sufisiente ona”.
Divulgasaun Projetu Implementasaun Desentralizasaun no Podér Lokál ne’e, diriji rasik hosi Primeiru-Ministru no akompaña hosi Vice-Prezidente Parlamentu Nasionál Adriano do Nascimento, Sekretáriu Estadu Desentralizasaun Administrativa, Tomás Cabral, Sekretáriu Estadu Dezenvolvimentu Lokál, Samuel Mendonça, Sekretáriu Estadu Fortalesimentu Institusionál, Francisco “Borlaku” Soares Sekretáriu Estadu ba Apoiu no Promosaun Setór Privadu, Veneranda Lemos.
Distritu Kovalima iha nia luan 1.226 km2, suku hamutuk iha 30 no ho ninia populasaun hamutuk ema 62.800. Atividade ekonómiku prinsipál sira iha distritu ne’e mak agrikultura subsisténsia iha propriedade sira familia nian, hakiak animál sira (karau) no foos ho potensiál dezenvolvimentu ekonómiku iha área sira petróliu, gás, hakiak animál sira, kolleita ai-han sira foun no turizmu.