Sentru Formasaun Téknika iha Komunikasaun (nia sigla mak Ceftec) no Sentru Protokolár Formasaun Profisionál Jornalista nian (nia sigla mak Cenjor), hetan apoiu hosi Komisaun Funsaun Públika, hala’o ona Semináriu Dahuluk Komunikasaun nian – “Interasaun ho Media sira”, iha loron 23 fulan Marsu tinan 2013, iha Salaun Ministériu Negósiu Estranjeiru no Kooperasaun nian, iha Dili.

Semináriu ida ne’e hetan partisipasaun maka’as hosi Ofisiál Tékniku Komunikasaun nian (Media Officers) ne’ebé Ministériu Prezidénsia Konsellu Ministru maka responsabiliza no hetan partisipasaun hosi ilustre oradór nasionál no internasionál sira, hanesan, eis-Primeiru-Ministru, Marí Alkatiri, Sekretáriu Estadu Konsellu Ministru, Avelino Coelho, Sekretáriu Estadu Komunikasaun Sosiál, Nélio Isaac, Prezidente Komisaun Funsaun Públika, Libório Pereira, Reverendu Padre Martinho Gusmão, Asesora Prezidénsia Repúblika nian, Gabriela Carrascalão, jornalista no formadór Cenjor nian sira, João Carlos Barradas no Cristina Guerreiro.

Prezidente Komisaun Funsaun Públika, hahú semináriu ne’e ho diskursu maklokek, kona-ba devér jerál tékniku komunikasaun nian, nu’udar regra jerál ba funsionáriu públiku sira: devér lealdade, devér obediénsia, devér zelu, devér sijilu, devér izensaun, devér asiduidade, devér pontualidade, ne’e maka devér jerál funsionáriu no ajente administrasaun públika sira nian atu hala’o parahodi hametin konfiansa iha asaun administrasaun públika nian.”

João Carlos Barradas, hato’o tema prinsipál semináriu nian, hatete katak “Prinsípiu atutuir hodi bele hetan interasaun di’ak ida ho media sira sempre hanesan: bele halo tuir loloos, maibé bele mós lahalo buat balu”. Cristina Guerrreiro, hatete tan katak,  formasaun ba kuadru tékniku sira husi institusionál nasionál ne’e importante tebes ba funsionamentu di’ak ba governasaun demokrátika ida.

Oradór nasionál sira, koa’lia liu kona-ba dezenpeñu atividade media officer sira nian, relasaun entre instituisaun Estadu ho órgaun komunikasaun sosiál nian sira, relasaun inter-ministeriál sira no komunikasaun institusionál. Tuir Padre Martinho Gusmão “tékniku komunikasaun tenkesér lee barak, no buka-hatene barak liután parahodi dezenpeña imi-nia funsaun no reprezenta didi’ak imi-nia instituisaun sira.”

Gabriela Carrascalão, hato’o ninia liafuan ba konvidadu 300 resin, hodi reforsa tan ideia katak ” xefe administrativa sira tenke fó dalan ba ninia tékniku komunikasaun sira atu bele hatene kona-ba situasaun interna, nune’e, media officer sira ne’ebé iha instituisaun nia laran bele hatene oinsá hatán ba jornalista sira.”

Eis-Primeiru-Ministru, Marí Alkatiri, iha ninia diskursu enseramentu, ko’alia kona-ba importánsia profisionalizasaun servisu internu Estadu nian sira no funsaun hirak ne’ebé mak lahanesan husi profisaun oin-oin, liuliu asesoria sira, advogadu sira no jornalista sira. Nia reforsa tan katak Estabilidade Nasionál sei hetan liuhusi dezenpeñu di’ak husi funsionáriu hotu-hotu instituisaun nian sira no nia mós tenik katak, opozisaun ida forte bainhira opozisaun ne’e foti problema sira ba Governu.

Semináriu ne’e hanesan faze ba-daruak programa formasaun espesializada ba jornalista sira (tinan 2013), ne’ebé hetan finansiamentu husi (UE) iha ámbitu programa Komunikasaun Sosiál-Kooperasaun delegada iha Portugál no hala’o nia knaar liuhusi  protokolu kooperasaun ida ne’ebé estabelese entre Governu Timor-Leste no Governu Portugál.

Iha semináriu ne’e asiste mós husi Prezidente Parlamentu Nasionál, Vicente Guterres, Vise Prezidente Parlamentu Nasionál, Adérito Hugo da Costa, Membru Ezekutivu, Korpu Diplomátiku, Reprezentante Portugál no EU nian, Embaixadór Brazíl, Diretór-Jerál, Diretór Nasionál, Xefe Departamentu, no Media Officer.