…………………………………………………………………………………………………………………..
Díli, Loron 2 Fulan Abril Tinan 2013
Komunikadu Imprensa
Sorumutu Konsellu Ministru nian iha loron 2 fulan Abríl tinan 2013
Governu Konstitusionál V hala’o sorumutu iha loron Tersa ne’e, loron 2 fulan Abríl tinan 2013, iha sala sorumutu Konsellu Ministru nian, iha Palásiu Governu, iha Dili no aprova ona:
1. Dekretu Lei ne’ebé Aprova Alterasaun Dahuluk ba Dekretu-Lei kona-ba Ajuda de Kustu ba dezlokasaun sira iha Servisu ba Estranjeiru
Diploma ida ne’e ninia obejtivu mak ajusta regalia hirak ne’ebé fó ba titulár no membru órgaun soberania nian sira, funsionáriu públiku sira, ajente administrativu sira, no kontratadu ekiparadu sira ba dezlokasaun ba estranjeiru bainhira hala’o servisu ofisiál, hanesan ho buat ne’ebé mak organizasaun internasionál sira pratika, liuliu Nasoins Unidas, atu hadi’a efisiénsia finansa públika nian.
2. Rejime Tributáriu
Konsellu Ministru apova rekomendasaun lubuk ida ne’ebé Diresaun Nasionál Impostu Doméstiku (DNID) nian aprezenta kona-ba kestaun hirak ne’ebé hetan iha aplikasaun lei tributária nian no iha kobransa efetiva reseita fiskál la’ós petrolífera.
Konsellu Minsitru mós analiza:
1. Aprezentasaun kona-ba projetu “Kairabela Freeport Zone”
Empreza Oceanic Maritime Services aprezenta ona ba Konsellu Ministru projetu ida kona-ba harii portu tranzbordu nian ida, ne’ebé dirije ba ró transporte internasionál nian hodi tula minerál sira.