Sekretaria Estadu Promosaun Igualidade (SEPI), hamutuk ho UN Women, organiza workshop kona-ba Komité CEDAW nian, iha Salaun Delta Nova, loron 13-14 fulan Marsu.

Iha abertura ba konsultasaun ne’e, Sekretária Estadu Promosaun Igualdade, Idelta Maria Rodrigues, hateten, “Ohin ita halo konsultasaun ne’e atu  rona tan ideia hirak hosi parte sosiedade sivil  sira, atu nune’e bele reforsa no kompleta liután relatóriu daruak no datoluk nian ne’ebé ita sei haruka  ba komité CEDAW. Tanba ne’e workshop ida ohin ne’e atu fortifika liután relatóriu ne’ebé hala’o ona molok atu submete ba iha komité CEDAW”.

“Relatóriu ne’e espesifiku duni, tanba ne’e mak partisipasaun hosi liña ministerial sira importante tebetebes tanba la’os SEPI mak ba hatan pergunta sira ne’e maibé, ministériu idaidak mak sei hatan kona-ba rekomendasaun espesífiku no jerál ne’ebé komité CEDAW hato’o mai Estadu Timor-Leste. Tanba ne’e mak ita agora atu hato’o buat balun ne’ebé ita konsege halo ona no seidauk bele halo, ne’e mak Estadu nia relatóriu ba situasaun feto sira nian iha Timor-Leste”, hateten Idelta Maria Rodrigues.

Marka prezensa iha workshop ne’e, Sekretária Estadu Promosaun Igualidade, Idelta Maria Rodrigues, Adjuntu Provedór Direitu Umanu, Silvério Pinto, Diretór-Jerál hosi liña ministeriál sira.