Ministra Solidariedade Sosiál, Isabel Amaral Guterres, akompaña hosi Diretór-Jerál mós Koordenadór-Jerál, Eugénio João Amado de Maria Soares, iha segunda-feira, loron 11 fulan Marsu tinan 2013, iha edifísiu Ministériu Solidariedade  Sosiál, Kaikoli, Díli, simu vizita hosi reprezentante Banku Mundiál, Junko Onishi, hanesan espesialista protesaun sosiál nian hodi hametin kooperasaun iha Projetu Administrasaun Protesaun Sosiál (PAPS).

Objetivu hosi hasoru malu  ne’e, hodi hametin Kooperasaun iha Projetu Administrasaun Protesaun Sosial (PAPS) no ko’alia kona-ba oinsá mak atu estabelese projetu protesaun sosiál, liuhosi sistema baze dadus integradu online.

Eugénio João Amado de Maria Soares, nu’udar mós Koordenadór-Jerál ba projetu PAPS, hateten, “Kooperasaun ne’ebé MSS hala’o ho Banku Mundiál sai hanesan pasu pozitivu ne’ebé fó ona suporta  ba funsionáriu MSS na’in rua hodi hetan kapasitasaun iha área tékniku Informasaun Teknolojia  iha Indonézia durante fulan tolu”.

Koordenadór-Jerál ne’e informa mós katak, “oras ne’e daudaun funsionáriu IT MSS prontu ona atu implementa baze dadus, bainhira mákina instaladora insersaun ba dadus ne’e iha ona, bele fasilita hadi’a di’ak liu tan dadus hothotu ne’ebé iha MSS, nune’e mós ba populasaun inklui benefisiárius sira hotu, hodi hatene sira nia direitu kona-ba subsídiu hanesan idozus”.

Eugénio Soares ne’e mós hato’o liután katak, ekipa MSS hamutuk ho Banku Mundiál hala’o ona inspesaun ba iha sentru distritál MSS nian sira (Oe-cusse, Same, Manatuto, Maliana no Baucau) no konsege identifika problemas ne’ebé ita hasoru mak hanesan enerjia eletrisidade la sufisiente hodi bele instala mákina insersaun, atu nune’e bele rejista dadus informasaun hosi distritu, liuliu kona-ba programa tolu mak hanesan, Idozu no Inválidu sira, Bolsa da Mãe no Dezastre Naturál sira.