……………………………………………………………………………………………………………..
Díli, Loron 25 Fulan Marsu Tinan 2013
Komunikadu Imprensa
Toleránsia pontu iha loron 28 fulan Marsu no loron 1 fulan Abril tinan 2013
V Governu Konstitusionál Timor-Leste nian diside ona fó toleránsia pontu iha loron 28 fulan Marsu no loron 1 fulan Abril, durante loron tomak, ba funsionáriu no ajente ministériu sira ka servisu ne’ebé sira depende ba, nune’e mós institutu no organizmu ne’ebé tama iha administrasaun indireta Estadu nian.
Desizaun ida-ne’e bazeia ba Lei nº 10/2005 loron 10 fulan Agostu nian, ne’ebé determina loron feriadu nasionál, data ofisiál komemorativa no toleránsia pontu. Entre data ofisiál komemorativa hirak ne’e, Kinta-feira Sanda mak iha tinan-tinan la monu iha loron hanesan.
Kinta-Feira Santa, tinan ida-ne’e sei selebra iha loron 28 fulan Marsu, loron ikus kuarezma nian iha kalendáriu relijiaun katólika nian, no loron ne’e nu’udar loron boot no importante tebes-tebes ba komunidade Kristaun Timor-Leste nian. Ho faktu ida-ne’e Governu hola desizaun fó toleránsia pontu, durante loron tomak.
Iha loron 1 fulan Abril, fó toleránsia pontu hodi ida-idak fila ba nia uma, hafoin selebrasaun Domingu Páskoa nian hamutuk ho família sira iha distritu.