…………………………………………………………………………………………………………………..
Díli, Loron 19 Fulan Marsu Tinan 2013
Komunikadu Imprensa
Sorumutu Konsellu Ministru loron 19 fulan Marsu tinan 2013
Governu Konstitusionál V hala’o sorumutu iha Tersa-feira ida ne’e, loron 19 fulan Marsu tinan 2013, iha sala sorumutu Konsellu Ministru nian, iha Palásiu Governu Dili no aprova ona:
1. Dekretu-Lei ne’ebé aprova Orgánika Ministériu Edukasaun nian
Tuir artigu 26.0 Dekretu-Lei n0. 41/2012 nian, loron 7 fulan Setembru, ne’ebé aprova estrutura orgánika Governu Konstitusionál V, Ministériu Edukasaun nu’udar órgaun responsável ba konsesaun, ezekusaun, koordenasaun no avaliasaun polítika, ne’ebé Konsellu Ministru define no aprova ona ba área Edukasaun nian hodi fo kompeténsia ba nia atu hala’o funsaun sira ne’ebé fó ba nia hosi diploma ne’e.
Sistema organizasaun foun nian ne’e kontinua de’it ba dezafiu sira ne’ebé Governu Konstitusionál IV fó sai ona kona-ba polítika edukasaun nian, hodi nune’e Ministériu Edukasaun mak kontinua investe iha estrutura funsionál no dinámika ida, ne’ebé efikás tebes iha ninia ne’ebé bele abranje diak liu ba teritoriu tomak no define diak liután ba ninia servisu sira ne’ebé sentrál, deskonsentradu no desentralizadu sira.
Haríi tiha ona Diresaun-Jerál haat hodi halibur ida-idak nia Diresaun Nasionál. Diresaun Rejionál sira lakon tiha, hodi mantein Diresaun Distritál sira hanesan Unidade Ezekusaun no operasionalidade ba medida edukativa nian sira.
2. Dekretu-Lei ne’ebé aprova Orgánika Ministériu Administrasaun Estatál nian
Dekretu-Lei n.o 41/2012, loron 7 fulan Setembru, ne’ebé prosede aprovasaun ba Orgánika Governu Konstitusionál V, prevee ezisténsia Ministériu Administrasaun Estatál nian, “hanesan órgaun responsável ba konsesaun, ezekusaun, koordenasaun no avaliasaun polítika ne’ebé Konsellu Ministru define no aprova ona, ba área sira podér lokál nian, desentralizasaun administrativa, dezenvolvimentu lokál no rurál, organizasaun no ezekusaun prosesu eleitorál no referendu nian sira, no prezervasaun ba dokumentu ofisiál sira”.
Ministru Administrasaun Estatál, nu’udar órgaun superiór Ministériu Administrasaun Estatál nian, hetan ajuda bainhira hala’o ninia funsaun sira hanesan Sekretáriu Estadu Desentralizasaun Administrativa no Sekretáriu Estadu Dezenvolvimentu Lokál, ne’ebé sira simu kompeténsia lubuk ida, no kompeténsia hirak ne’e sira hala’o no artikula tuir estrutura Ministériu Administrasaun Estatál nian liuhosi diploma ne’e.
3. Dekretu-Lei ne’ebé aprova Orgánika Ministériu Turizmu nian.
Diploma ne’e estabelese Orgánika Ministériu Turizmu nian, hodi kumpre Dekretu-Lei n.0 41/2012, loron 7 fulan Setembru, ne’ebé aprova Orgánika Governu Konstitusionál V no Programa Governu Konstitusionál V Repúblika Demokrátika Timor-Leste nian.
Orgánika Ministériu Turizmu nian ne’e atualiza ninia estrutura servisu sira, hodi fó kompeténsia hirak nesesáriu hodi bele hala’o ba oin polítika Governu nian sira ba área hirak ne’e, tuir Programa.
4. Dekretu-Lei ne’ebé aprova Orgánika Ministériu Transporte no Komunikasaun nian
Ministériu Transporte no Komunikasaun, tuir Dekretu-Lei n.0 41/2012, loron 7 fulan Setembru ne’ebé aprova orgánika Governu Konstitusionál V, mak órgaun responsável ba konsesaun, ezekusaun, koordenasaun no avaliasaun polítika, ne’ebé defini no aprova ona iha Konsellu Ministru, ba área transporte terrestre, marítima no aéreu ne’ebé ho karákter sivil no servisu hirak atu tulun nian, hosi komunikasaun nian, inklui servisu postál, telegráfiku, telefóniku no telekomunikasaun sira seluk, hosi servisu meteorolójiku no hosi informátiku nian.
Planu Estratéjiku Dezenvolvimentu (PED) prevee, hanesan objetivu boot ba nível transporte no komunikasaun nian, mak dezenvolvimentu portu rejionál sira, halo luan tan Aeroportu Nasionál, hadi’a fali pista sira aviaun atu tun iha distritu sira no loke merkadu telekomunikasaun nian sira ba operadór barak liután.
Modelu organizasaun nian ne’ebé propoin ona, bazeia ba servisu sentrál sira no organizmu ne’ebé hetan autonomia administrativa no finanseira nian, buka atu hetan jestaun ida di’ak no efisiente liu hosi rekursu públiku sira hodi serbi ba populasaun.
5. Mekanizmu Ezekusaun Orsamentu Jerál Estadu nian ba tinan 2013
Konsellu Ministru aprova ona mekanizmu sira ba ezekusaun OJE tinan 2013 nian, ne’ebé aprezenta husi Ministériu Finansa, hafoin aprova tiha Lei n.0 2/2012, loron 1 fulan Marsu, kona-ba Orsamentu Jerál Estadu (OJE) ba tinan finanseiru 2013 nian, liuliu: prosedimentu jerál; prosedimentu sira kona-ba ezekusaun tuir kategoria ida-idak; Fundu Maneiu no adiantamentu sira; reseita públika sira; no kalendáriu kona-ba hala’o orsamentu tinan 2013 nian no preparasaun OJE tinan 2014 nian.
Konsellu Ministru, mós, analiza ona:
1. Aprezentasaun kona-ba Operasionalizasaun Planu Estratéjiku Dezenvolvimentu nian
Durante tinan lima tuirmai, no tanba hakarak atu operasionaliza, halo jestaun no atu koordena Planu Estratéjiku Dezenvolvimentu (PED) no Program Governu Konstitusionál V nian, mak presija atu estabelese Mekanizmu ba Koordenasaun Polítika Dezenvolvimentu (MCPD) foun.
Bazeia ba lisaun hirak ne’ebé aprende tiha ona liu hosi Programa kona-ba Prioridade Nasionál sira (ne’ebé Governu Konstitusionál IV hahú ona iha tinan 2008), mak Timor-Leste tenki harii no lidera ona MCPD, konta hela ona ho partisipasaun ida másimu no tenkesér konsistente ho sistema planeamentu no orsamentasaun Governu nian.
2. Aprezentasaun ba apresiasaun Dahuluk kona-ba Polítika Desentralizasaun Administrativa no Podér Lokál nian
Tuir artigu n.u 1 artigu 5.u no n.u 1 artigu 72 Konstituisaun Repúblika nian, ne’ebé mak prevee desentralizasaun administrasaun públika no ezisténsia podér lokál nian, nune’e mós iha lei n.0 11/2009, loron 7 fulan Outubru, ne’ebé maka prevee territóriu RDTL fahe ba munisípiu 13, no hetan autonomia administrativa no finanseira no hetan órgaun hirak reprezentativu no eleitu, mak Ministru Administrasaun Estatál aprezenta ona ba Konsellu Ministru esbosu dahuluk kona-ba Polítika Desentralizasaun Administrativa no Podér Lokál nian.