Ministru Estadu no Prezidénsia Konsellu Ministru no

Porta-Vóz Ofisiál Governu Timor-Leste

Díli, Loron 21 Fulan Marsu Tinan 2013

Julgamentu fiskál ba dahuluk ho rezultadu pozitivu

Prosesu ba dahuluk kona-ba likidasaun sira impostu nian ne’ebé fó sai ba Kontraente minarai no gás nian sira hakotu iha loron 19 fulan Marsu tinan 2013. Likidasaun ba impostu sira ne’e, fó sai atu hadi’a fali reseita fiskál sira ne’ebé mak autoridade fiskál sira fiar katak Timor-Leuranteste maka hakarak atu tahan hela, bazeia ba fallansu husi Kontraente sira nian atu fornese dokumentasaun apoiu ba ninia deklarasaun impostu nian. Hafoin hala’o tiha julgamentu durante loron rua nia laran iha Tribunál Distritál Díli, Kontraente ne’e konkorda atu fornese dokumentasaun ne’ebé mak uluk Estadu husu.

Kazu ne’e bazeia ona husi  avaliasaun sira ne’ebé mak Kontraente sira lakohi atu konprova osan millaun barak husi dedusaun fiskál nian, loloos dedusaun ne’e rasik tenke tuir lei.

Bainhira justifikasaun dedusaun fiskál nian la halo ona aprezentasaun, Estadu fó sai likidasaun impostu ida ho penalidade sira. Ida ne’e mak kazu dahuluk ne’ebé hetan julgamentu iha Tribunál Distritál Dili.

Hafoin alegasaun finál, Kontratante informa ba Tribunál ne’ebé simu atu fornese ba Estadu dokumentu hirak ne’ebe husu. Kontratante ne’e mós hato’o hanesan katak, iha konversa informál ho Estadu, halo ona proposta ida atubele hetan akordu ida, bainhira juis na’in tolu ne’e halo deliberasaun.

Atu fó tempu ba Estadu no Kontratante hodi hetan akordu ida hafoin halo tiha análize ba dokumentu sira, juis sira mak atraza atu fó sai rezultadu husi faktu sira ne’e to’o loron 6 fulan Maiu. Estadu rekoñese Kontratante ninia esforsu hodi hasoru situasaun ne’e no hadi’a ninia relasaun ba aban-bainrua nian.

Bainhira Estadu no Kontratante seidauk hetan akordu ida, Juis koletivu sira sei fó sai Akórdaun iha loron 6 fulan Maiu, iha tempu ne’ebé parte rua ne’e iha loron 10 atu halo prosesu. Maibé, Estadu optimista ho posibilidade atu hetan akordu ida, haree katak Kontratante iha vontade atu fornese dokumentasaun no hetan rezultadu ida ne’ebé justu no ekitativu atuhodi fó indemnizasaun ba  Estadu.

Portavós Governu Konstitusionál V, Ministru Agio Pereira, hateten katak “Timor-Leste tenke orgullu ho prosedimentu internasionál ne’ebé maka hala’o ona, tuir duni prátika di’ak tebetebes konforme justisa ida ne’ebé maka justu no ekitativu; ne’ebé hamosu konfiansa ba parte rua ne’e hotu. Ne’e hanesaun rezultadu ida pozitivu liután, hatudu katak Kontratante sira hakarak hahú diálogu ida loloos ho Estadu. Ida ne’e sei hametin ita-nia parseria no garante komprensaun husi parte rua ne’e hotu, daudaun ne’e no ba aban-bainrua nian”.