Sorumutu Konsellu Ministru nian iha loron 5 fulan Marsu tinan 2013
Prezidénsia Konsellu Ministrus
V Governu Konstitusionál
...................................................................................................................................
Díli, Loron 5 Fulan Marsu Tinan 2013
Komunikadu Imprensa
Sorumutu Konsellu Ministru nian iha loron 5 fulan Marsu tinan 2013
Governu Konstitusionál V hala’o sorumutu iha loron Tersa ne’e, loron 5 fulan Marsu tinan 2013, iha sala sorumutu Konsellu Ministru nian, Palásiu Governu, iha Dili no aprova ona:
1. Proposta Lei ne’ebé mak aprova Orgánika Prezidénsia Repúblika nian
Diploma ne’e ninia objetivu atu armoniza Lei Orgánika Prezidénsia Repúblika ho Konstituisaun Repúblika nian kona-ba atuasaun, autonomia no independénsia husi órgaun soberania ida ne’e. Hala’o hikas fali fórmula servisu prezidénsia nian balu, hanesan Servisu Apoiu Médiku, Sentru Komunikasaun no Gabinete Apoiu ba Kónjuje (kabena’in sira mane no feto).
Diploma ne’e sei haruka ba Parlamentu Nasionál iha tempu badak nia laran, hanesan Proposta Lei, tuir Konstituisaun Repúblika nian.
2. Proposta Lei kona-ba Autorizasaun Lejizlativa iha Matéria Ezekusaun Pena no Médida Privativa no La’ós Privativa sira kona-ba Liberdade
Dekretu-Lei ne’e ninia objetivu mak hadi’a sistema administrasaun justisa penál iha Timor-Leste no hetan sistema ezekusaun pena ida no medida hirak ne’ebé umanu, justu no seguru, ne’ebé orienta ba reintegrasaun dadur sira nian iha sosiedade. Halo mós korresaun ba lakuna importante ida iha domíniu Administrasaun justisa penál, ne’ebé, husi kedas ninia kriasaun, dezenvolve neineik maibé lahalo ninia enkuadramentu legál no normativu ne’ebé mak tenke halo, maibé to’o oras ne’e konta de’it ho Regulamentu UNTAET n.u 2011/23 loron 28 fulan Agostu, kona-ba kriasaun servisu prizaun nian ida iha Timor-Leste no ho norma balun ne’ebé sés husi Kódigu Penál no Kódigu Prosesu Penál. .
3. Rezolusaun Governu nian kona-ba nesesidade atu garante fornesimentu kombustível no harii Rezerva ida Estratejíka Kombustível nian
Governu, kompromete ona atu garante distribuisaun nasionál eletrisidade nian, hasoru problema ho ezisténsia númeru fornesedór sira kombustível nian ne’ebé uitoan liu, sai hanesan obstákulu ida, ba distribuisaun eletrisidade nune’e mós ba utilizasaun infraestrutura sira omak ne’ebé mak disponível iha Sentrál Elétrika Hera nian.
Tanba ne’e, Konsellu Ministru analiza ona fornesimentu Diesel Velosidade Aas ba EDTL nian, E.P. hodi fó mandatu ba Ministru Obras Públikas atu diskuti asuntu ne’e ho TIMOR GAP, E.P – ne’ebé kria liuhusi Dekretu-Lei n.u 31/2011, loron 27 fulan Jullu- ne’ebé fó ba EDTL,E.P. meiu materiál no koñesimentu ne’ebé importante atu garante fornesimentu kombustível no harii Rezerva ida Estratéjika Kombustível nian, hodi bele mantein iha nível ne’ebé seguru ba abastesimentu kombustível iha nasaun laran no mós iha parte seluk, bele kria instrumentu kontrolu ida bainhira folin kombustível nian sa’e.
4. Rezolusaun Governu nian ne’ebé mak hanaruk mandatu Komisaun ne’ebé jere SAMES E.P
Konsellu Administrasaun Servisu Autónomo Medikamentu no Ekipamentu Saúde, Empreza Públika (SAMES,E.P.) ne’ebé disolve ona tuir rezolusaun Governu nian n.u 22/2012, loron 31 fulan Outubru nian no, ba ninia substituisaun temporária, kria ona komisaun ida ne’ebe mak iha ninia misaun atu kaer metin jestaun no funsionamentu SAMES, E.P nian.
Tanba Komisaun ne’e ninia misaun temporária ba loron 120 de’it, ne’ebé hotu ona iha fulan Fevereiru liubá ne’e, Konsellu Ministru hakotu ona hodi hanaruk mandatu Komisaun SAMES E.P. nian ba loron 120 tan.
Konsellu Ministru mós analiza ona:
1. Dekretu-Lei ne’ebé mak aprova Orgánika Ministériu Turizmu nian
Diploma ida ne’e estabelese Orgánika Ministériu Turizmu nian, atu kumpre Dekretu-Lei n.u 41/2012, loron 7 fulan Setembru, ne’ebé mak aprova Orgánika Governu Konstituisonál V no Programa Governu Konstituisonál V Repúblika Demokrátika Timor-Leste nian.
