Timor-Leste ho Noruegia hametin kooperasaun iha setór Justisa
Ministru Justisa, Dionísio Babo Soares, iha tersa-feira, loron 26, fulan Fevereiru, tinan 2013, iha gabinete Ministériu Justisa, Kaikoli, Díli, hasoru malu ho Embaixadór dezignadu Noruega nian, Stig Ingemar Traavik, hodi hametin kooperasaun entre nasaun Timor-Leste no nasaun Noruega iha setór justisa.
Ministru Justisa iha surumutuk ne’e hateten katak, nasaun Noruega fó ona ninia kontribuisaun maka’as iha Timor-Leste, liuliu iha setór Justisa liuhosi parseriu dezenvolvimentu UNDP. Nasaun ne’e rasik to’o agora seidauk loke Embaixada iha Timor-Leste, maibé iha futuru nia hanoin ona atu harii ninia embaixada ida iha ita nia país.
Iha fatin hanesan, Stig Ingemar Traavik mós hateten katak, “Noruega prontu nafatin atu halo kooperasaun di’ak ho Timor-Leste, maske agora daudaun ami seidauk loke embaixada iha ne’e. Ohin hanesan loron ida importante hodi hasoru malu ho Ministru Justisa, atu oinsá ba futuru bele servisu hamutuk hodi haree ba setór justisa nian”.
