……………………………………………………………………………………………………………..
Díli, Loron 25 Fulan Fevereiru Tinan 2013
Komunikadu Imprensa
Sorumutu estraordináriu Konsellu Ministru iha loron 25 fulan Fevereiru tinan 2013
Governu Konstitusionál V hala’o sorumutu estraordináriu iha Segunda-feira, loron 25 fulan Fevereiru tinan 2013, iha sala sorumutu Konsellu Ministru nian, iha Palásiu Governu, iha Dili, no aprova ona:
1. Rezolusaun Governu nian kona-ba CPD-RDTL
Hahú kedas husi tinan kotuk ba nia rohan, iha zona sira distritu Manufahi nian, liuliu iha Welaluhu, órden no seguransa públika, moris-hakmatek no rikusoin populasaun iha fatin ne’ebá ameasadu.
Situasaun ida ne’e mosu tanba asaun ilegál hirak ne’ebé pratika husi grupu CPD-RDTL nian, hanesan okupa ema nia rai privadu, rai públiku no rai komunidade nian. Iha mós suspeita kona-ba prátika krime nian (hanesan na’ok, hadau no violasaun) ne’ebé momoos de’it la respeitu ona direitu umanu no lei hirak ne’ebé vigora iha nasaun ne’e. Sua Exelénsia Prezidente Repúblika husu ona ba Governu atubele tau atensaun espesiál ba problema ida ne’e.
Iha sentidu ida ne’e, Konsellu Ministru rezolve, hafoin rona tiha Sekretáriu Estadu Seguransa no Komandante Jerál PNTL, no hafoin halo análize ida ne’ebé kle’an kona-ba situasaun ne’e no ninia implikasaun sira, fó instrusaun ba Ministériu Defeza no Seguransa atu, liuhusi PNTL (iha kumprimentu ba lejizlasaun, liliu ne’ebé regula kona-ba uzu forsa nian): uza medida hotu-hotu ne’ebé adekuada atu estebelese fila-fali pás sosiál, atu proteje populasaun lokál, sira nia sasán no meiu hodi buka moris nian sira; previne atu situasaun seguransa nian labele agrava liu tanba okupasaun rai ho ilegál husi grupu CPD-RDTL nian; no foti medida hirak ne’ebé presiza atu situasaun sira hanesan ne’e labele mosu tan iha fatin seluk iha nasaun nia laran.
Governu respeita veteranu hotu-hotu ne’ebé luta ba ukun rasik-an, maibé ejize respeitu ba Istória Libertasaun nian no hakruk ba lei sira nasaun ne’e nian, ne’ebé ema se de’it labele hakat liu, nein husi sira hirak ne’ebé konsidera-an, ka ema konsidera hanesan, asuwa’in nasionál sira.
Nune’e, tuir Konstituisaun, ne’ebé fó ba Governu kompeténsia atu tau matan ba seguransa rai-laran nian, Ezekutivu iha devér atu garante katak Polísia Nasionál Timor-Leste (PNTL), bazeia ba ninia mandatu, foti medida hirak ne’ebé presiza hodi estabelese fila-fali normalidade konstitusionál no órden públika nian.
Konsellu Ministru halo mós análize kona-ba:
1. Arezentasaun kona-ba Servisu iha Meiu Prizaun nian
Ministériu Justisa, aprezenta ona ba Konsellu MInistru projetu ida kona-ba servisu prizaun nian, ne’ebé ninia objetivu prinsipál mak fó ba dadur sira kompeténsia pesoál no profisionál sira atubele dezenvolve atividade laborál ida ne’ebé prepara sira atu integra fali sira nia-an iha sosiedade, hafoin sai tiha husi prizaun.