Konsensu Díli nian nu’udar naran ba dokumentu ne’ebe rezulta hosi sorumutu loron ida ho balun nian, iha Sentru Konvensaun kapitál timor nian, husi partisipante sira besik na’in 227 husi país 48 resin, ne’ebe mak dezloka mai Timor-Leste hodi partisipa iha Konferénsia Internasionál kona-ba Ajenda Dezenvolvimentu Póz-2015, ho ninia tema: “Dezenvolvimentu ba ema hotu: akotu ho konflitu sira, harii Estadu no hamenus ki’ak !”, ne’ebé remata iha loron 28 fulan Fevereiru.

Objetivu hosi Nasaun partisipante sira mak,  ho elaborasaun dokumentu ida ne’e, atu husi parte país frájil sira (g7+), Illa Pasífiku no PALOP (País Afrikanu ho Lian Ofisiál Portugués), hodi hola pozisaun ida preparadu ona iha Sorumutu Painél ba-Dahaat husi Altu Nível kona-ba Ajenda Dezenvolvimentu Póz-2015, ne’ebe mak tau tiha ona iha ajenda ba loron 25 to’o 28 fulan Marsu, iha Bali.

Iha segundu, no loron ikus sorumutu nian ne’e, partisipante sira hahú hato’o konkluzaun sira  husi sorumutu lima ne’ebé hala’o ketak-ketak, iha Segunda-feira, loro-kraik, loron 27 fulan Marsu, no ne’ebe mak sai hanesan baze ba elaborasaun Konsensu Díli nian. Sorumutu  keta-ketak hirak ne’e ho ninia tema boot rua: Objektivu Dezenvolvimentu Miléniu, no saida mak sei inklui iha objektivu dezenvolvimentu póz-2015. Hato’o tiha ona mós preokupasaun hirak mak hanesan: alterasaun klimátika, governasaun di’ak, harii Estadu no dezenvolvimentu, harii Pás liuhusi protesaun Umana no seguransa pesoál, kreximentu inkluzivu, kriasaun empregu, hamenus pobreza, igualdade jéneru, no seluseluk tan.

Esplikasaun sira kona-ba saída mak hakarak atu hala’o no oinsá atu hala’o prosesu hotu ba elaborasaun Ajenda Dezenvolvimentu Póz-2015  ne’e nian, kargu maihosi Sekretáriu-Jeral Painél Altu Nível Pesoa Eminente sira kona-ba Ajenda Dezenvolvimentu Póz-2015, Homi Kharas, liuhusi mesajem vídiu nian ida, no David Hallam, Vise-Diretór ba Objetivu Dezenvolvimentu Póz-2015, Oluremi Gabriel Sogunro, Asesór Prezidente Repúblika Libéria no William Palitondok Sabandar, Asistente Espesiál Prezidente Indonésia nian.

Atu taka sesaun sorumutu nian hahú ho leitura Konsensu Díli, husi Ministru Finansas no Tezouru, Rick Nelson Houenipwela, ne’ebé reprezenta Primeiru-Ministru Illa Salomão, no taka ofisiál hosi Primeiru-Ministru Timor-Leste nian, Kay Rala Xanana Gusmão, ne’ebe, iha ninia diskursu hateten kona-ba kapasidade no nesesidade país frájil sira nian “atu loke sira-nia dalan, sira-nia Istória”.