Ministru Petróliu no Rekursu Minerál simu vizita omólogo Austrália nian
Ministru Petróliu no Rekursu Minerál (MPRM), Alfredo Pires, simu vizita hosi Ministru Enerjia no Turismu Austrália nian, Deputadu Martin Ferguson, iha loron 21 fulan Fevereiru tinan 2013, iha Ministériu Petróliu no Rekursus Minerál, Fomentu, Díli.
Vizita Martin Ferguson, iha Timor-Leste, atu hala’o diskusaun kona-ba kestaun transparénsia, dezenvolvimentu rekursu umanu entre nasaun rua ne’e iha parte rekursu minarai nian, kona-ba tratadu CMATS,” Ita sei buka hela opsaun ne’ebe di’ak ba Timor-Leste husi tratadu “Certain Maritime Agreement on Timor Sea (CMATS)”.
“Hau hakarak dehan katak daudaun ne’e ita preokupa tebes kona-ba tratadu ne’e, tanba ho nia durasaun durante tempu naruk, dala ruma ita bele hili dalan unilaterál hodi sai husi tratadu ne’e, maibé ita tenke diskuti lai ho Governu Austrália”, hateten Ministru Petróliu no Rekursu Minerál, Alfredo Pires.
Alfredo Pires esplika liután, “mazke akontese buat seluk iha tratadu CMATS, maibé kona-ba asuntu greater sunrise, teknikamente Timor-Leste kontinua mantein nia pozisaun hodi dada kadoras minarai nian mai Timor-Leste”.
Iha fatin hanesan, Ministru Enerjia no Turizmu Austrália nian, Deputadu Martin Ferguson, afirma katak, “Austrália iha kompromisu boot atu servisu hamutuk ho Timor-Leste iha jestaun konjunta ba rekursu mina no gás iha área Konjunta Dezenvolvimentu Petrolíferu (JPDA) no Dezenvolvimentu Greater Sunrise nia kampu gás sira iha tasi Timor.
Ferguson esplika kona-ba tratadu CMATS, “ne’e kompeténsia Ministru Negósiu Estranjeiru no Kooperasaun Timor-Leste ho Austrália nian”.
