Ministériu Agrikultura no Peska (MAP), liuhusi Ministru Mariano Assanami Sabino, konvida Prezidente Repúblika, Taur Matan Ruak, iha loron sábadu 23, fulan Fevereiru, hala’o kolleita Ikan salmaun ba daruak hosi kompañia Meti Murak Lda, iha Metinaru, Díli.

Prezidente Repúblika, Taur Matan Ruak, iha ninia intervensaun hato’o solidariedade ba kompañia Meti Murak ho esperansa katak, produsaun ikan hosi kompañia ne’e bele hamenus importasaun ikan  no aumenta rendimentu osan iha rai laran hodi fó benefísiu ba sidadaun sira, tanba ne’e ho inisiativa hakiak ikan ne’e di’ak tebes tanba bele fó duni oportunidade ba sidadaun sira atu han ikan, hodi kombate problema malnutrisaun liuliu ba labarik sira iha Nasaun Timor-Leste.

Mariano Assanami Sabino, informa mós katak, Governu iha planu ne’ebé konkretu atu ajuda kompañia sira hotu ne’ebé mak iha inisiativa hodi hakiak ikan, tanba ne’e, Governu sei buka ajuda atu bele dezenvolve di’ak  liután ikan sira ne’e ho valór ne’ebé boot tébes hodi bele fa’an iha merkadu internasionál.

Iha fatin hanesan Diretór Kompañia Meti Murak Lda. Amaro Ximenes, informa katak, ho rezultadu hirak ne’e ami hakarak atu kontribui ba dezenvolvimentu iha área peska nian.

Marka Prezensa iha kolleita ikan ne’e mak, Prezidente Repúblika, Taur Matan Ruak ho Primeira Dama, Isabel da Costa Ferreira, Vise Primeiru-Ministru, Fernando Lasama de Araújo, Ministru Agrikultura no Peska, Mariano Assanami Sabino, Vise Ministru Agrikultura no Peska, Marcos Da Cruz, Membru Parlamentu Nasionál, jornalista no komunidade balun iha área Metinaru nian.