Ministeriu Turismu, iha loron 13 fulan fevereiru 2013, iha Díli, organiza eventu “Karnaval 2013” ho tema sentrál “Kontente iha Liberdade no Pluralidade”. Objetivu hosi atividade ne’e atu hametin relasaun entre juventude hodi kontribui atu mantein kultura no tradisaun Nasaun ne’e nian.

Primeira Dama, Isabel Ferreira, elojia inisiativa no empeñamentu hosi Ministeriu Turismu nian, tanba ho tempu ne’ebé limitadu, maibé konsegue realiza duni Karnaval tinan ne’e: “Karnaval sai ona tradisaun no kultura ida ba Timor-leste, ne’e duni tinan-tinan tenke realiza hodi bele fó motivasaun ba juventude sira atu promove sira nia talentu no kreatividade liuhusi eventu ne’e, nomós ba turismu nasaun ne’e nian”.

Iha parte seluk, Sekretária Estadu Arte no Kultura, Isabel Ximenes hateten katak, Karnaval hanesan eventu ida ne’ebé realiza iha nível internasionál. Timor-Leste mós sempre selebra eventu ne’e, tanba iha mós relasaun ho relijiaun no liuhusi eventu ne’e ita aprende ita nia kultura rasik no ema seluk nian.