Tuir Protokolu Kooperasaun ne’ebé assina ona iha mandatu Governu Konstitusionál IV, entre Sekretaria Estadu Konsellu Ministru (SEKM) no Universidade Nasionál Timor Lorosa’e (UNTL), Sekretaria Estadu foun Komunikasaun Sosiál nian (SEKomS) hatutan no habelar nafatin protokolu ida ne’e, liuhosi kriasaun programa estájiu ida ba komunikasaun sosiál.

Prosesu kandidatura ba programa ida ne’e, SEFTEK no UNTL maka dezenvolve. Durasaun  kandidatura ba alunu sira fulan-ida no ba empreza no instituisaun sira Estadu nian ne’ebé iha interese atu oferese estájiu. Ninia rezultadu mak iha oferta vaga estájiu sira nian 70 (iha área maka hanesan Relasaun Públika, Marketing, Audio-vizuál no Jornalizmu Imprensa, Televizaun no Rádiu nian) ba alunu UNTL sira 70 resin, ne’ebé tau-naran ona.

Empreza privada no departamentu públiku oioin ne’ebé mak oferese vaga oferta sira estájiu nian maka hanesan tuirmai ne’e: Rádiu Rakambia, Timor-Telekom, The Dili Weekly, TVTL, E.P, Grupu Media Nasionál, Jornál Independente, Timor-Leste Media Development Center, Suara Timor Lorosa’e, Timor-Post, Agência Lusa, Gabinete Komunikasaun Prezidénsia Repúblika, Gabinete Apoiu Parlamentár Parlamentu Nasionál nian, Sekretaria Estadu Asuntu Parlamentár, Gabinete Primeiru-Ministru no Sekretaria Estadu Komunikasaun Sosiál, (ba Sentru Rádiu Komunitária no Diresaun Nasionál Diseminasaun Informasaun).

Estájiu kurrikulár sira iha durasaun fulan-ida no estájiu profisionál sira sei ramata iha fulan rua nia laran. Estajiáriu sira sei hetan orientasaun hosi profesór sira Komunikasaun Sosiál UNTL nian hamutuk ho empreza sira.