Diskusaun no votasaun kona-ba Proposta Lei n.° 2/III kona-ba Orsamentu Jerál Estadu (OJE) ba tinan 2013 nian remata iha loron Segunda, loron 18, fulan Fevereiru, iha Parlamento Nasionál, ho ninia aprovasaun finál.

Diploma ne’ebé Governu Konstitusionál da-V hato’o ne’e hetan modifikasaun balun ne’ebé rezulta husi aprovasaun deputadu sira nian kona-ba proposta alterasaun balun. Tuir proposta hirak ne’ebé deputadu sira lori ba oin, despeza sira diminui $150 tokon atus ida limanulu, relasiona ho proposta ne’ebé mak aprezenta hosi Governu.

Nune’e totál dotasaun ba orsamentu hamutuk $1.647,519 (tokon rihun ida atus neen haatnulu resin hitu no rihun atus lima sanulu resin sia  dólar amérika) fahe ba kategoria hanesan turi mai ne’e:

1 – $160,531 (tokon atus ida neenulu no rihun atus lima tolunulu resin ida dólar amérika) ba Saláriu no Vensimentu;

2 – $441,530 (tokon atus haat haatnulu resin ida no rihun atus lima tolunulu  dólar amérika) ba Beins no Servisu;

3 –$238,985 (tokon atus rua tolunulu resin ualu no rihun atus sia ualunulu resin lima dólar amérika) ba Transferénsia Públika;

4 –$49,595 (tokon haatnulu resin sia no rihun atus lima sianulu resin lima dólar amérika) ba Kapitál Menór;

5 –$756,877 (tokon atus hitu limanulu resin neen no rihun atus ualu hitunulu resin hitu dólar amérika) ba Kapitál Dezenvolvimentu.

Totál osan ba Fundu Infra-Estrutura nian, inklui empréstimu sira, hamutuk $604,377 (tokon atus neen resin haat no rihun atus tolu hitunulu resin hitu dólar amérika), enkuantu ba Fundu Dezenvolvimentu Kapitál Umanu osan ne’ebé aprova hamutuk $42,448 (tokon haatnulu resin rua no rihun atus haat haatnulu resin ualu dólar amérika).

Totál máximu ne’ebé aprovadu bá endividamentu públiku iha tinan 3013 hamutuk $43,6 (tokon haatnulu resin tolu no rihun atus neen dólar amérika).

Lei OJE tinan 2013 hetan aprovasaun iha votasaun finál globál ho votu afavór 64 (neenulu resin haat), kontra  0 (zero) no abstensaun 0 (ida).

Testu finál Komisaun C – Ekonomia, Finansa no Anti-Korrupsaun Parlamentu Nasionál nian mak sei hakerek molok atu haruka ba Prezidente Repúblika hodi hetan promulgasaun.