FALINTIL–Forsa Defeza Timor-Leste (F–FDTL), komemora nia aniversáriu ba dasanulu-resin-ruak, iha loron 2 fulan  Fevereiru, tinan 2013, iha Kuartél Jerál Fatuhada, Díli, ho tema “F–FDTL tenke haraik-an hodi serví povu no halo sakrifísiu atu dezenvolve estabilidade no seguransa iha Timor-Leste” .

Iha serimónia ne’e, Xefe Estadu Maior Jenerál F–FDTL, Lere Anan Timur, hateten katak “selebrasaun F–FDTL nian ba dasanulu-resin-ruak ne’e la’ós instituisaun nian maibé loron resepsaun nian, hodi haree no hanoin kona-ba instituisaun nia dezenvolvimentu profesionalizmu no konsolidasaun iha tinan 12 nia laran. Ita-nia forsa presiza moderniza ho ekipamentu sira ne’ebé di’ak no adekuadu, atu nune’e bele hatán ba ezijénsia povu nian. Ita presiza tau matan ba soldadu sira-nia móris hodi kria kondisaun di’ak ba sira, nune’e bele halo servisu nafatin iha oras 24 nia laran ba nasaun no povu”.

Lere Anan Timur mós fó onra bo’ot ba veteranu sira ne’ebé hola parte iha dezenvolvimentu instituisaun nian to’o ohin loron: “Imi mak tau matan duni ba instituisaun ne’e ho imi-nia sakrefisiu fizíku, materiál no espirituál, ho imi-nia determinasaun no konviksaun, maka ohin loron ita harii F–FDTL”.

Iha fatin hanesan, Prezidente Repúblika nu’udar Komandante Supremu Forsa Defeza no Seguransa nian, Taur Matan Ruak, iha ninia diskursu hateten “bainhira hanesan forsa F–FDTL ne’ebé forte, kredível no iha responsabilidade hodi garante pás no estabilidade ba nasaun no povu nian, tenki kontinua mós hasa’e sira nia kapasitasaun rekursu umanu sira”.

“Ha’u nia agradesimentu ba koloborasaun no apoiu povu Timor-Leste nian durante ne’e, agora no ba futuru, hodi harii pás no estabilidade, progresu no dezenvolvimentu ida di’ak ba nasaun. Maiske dezenvolvimentu F–FDTL la’o neneik maibé iha buat barak la’o di’ak ona no balu ne’ebé mak presiza atu halo di’ak liután hanesan”, hateten Prezidente Repúblika.

Iha komemorasaun, membru F–FDTL hamutuk 143 hetan promosaun deviza, hosi deviza kapitaun sa’e ba tanente hamutuk na’in 25, deviza alferis ba tanente hamutuk na’in 60, sa’e ba alferis iha nain 8, sa’e ba sarjentu ema na’in 1, sa’e ba sarjentu ajudante ema na’in 4, sa’e ba primeiru sarjentu ema na’in 8, sa’e ba segundu sarjentu iha ema na’in 2 no sa’e ba deviza kabu hamutuk ema na’in 35.