Governu liuhosi, Sekretária Estadu Promosaun Igualdade, Idelta Maria Rodrigues, hamutuk ho Xefe Ekipa Likidasaun UNMIT no Koordenadór Rezidente Nasõens Unidas nian, Finn Riske Nielsen, Iha Sesta-feira, loron 25  fulan  Janeiru, tinan  2013, lansa Espozisaun ho Tema ‘’Lian Hosi Rai’’ iha Sentru Konvensaun, Díli.

“Timor-Leste simu apoiu finanseiru hosi Millennium Development Goals Achievement Fund (MDG-F), hodi implementa programa konjunta, apoiu ba Igualdade jéneru no direitu ba feto inklui promove sustentabilidade Ai-han ho seguransa alimentár. Programa espozisaun ne’e, sei loke ba públiku no sei fó benefisiu maka’as no bele muda ideia sira, mentalidade no hahalok negativu sira sai pozitivu, hodi hadook an hosi violénsia iha família laran”, esplika Idelta Maria Rodrigues.

Iha fatin hanesan, Finn Riske Nielsen haktuir katak, programa “Lian Hosi Rai” hanesan parte ida hosi avaliasaun estudu kazu partisipativu ne’ebé hala’o ona durante tinan 2012 ho objetivu atu avalia impaktu dezenvolvimentu iha Timor-Leste.