Ministru Obras Públikas, Gastão de Sousa, no Ministru Petróleu no Rekursu Minerál, Alfredo Pires, lansa asinatura konjunta faze dahuluk nian ba projetu auto-estrada hosi Suai to’o Beacu, Vikeke iha loron 25, fulan Janeiru, tinan  2013,  iha Salaun konferénsia Timor Gap, Timor Plaza, Díli.

Ministru Obras Públikas, Gastão de Sousa, iha ninia diskursu hateten katak, “Projetu auto-estrada ne’e tuir dezeñu, ninia naruk 30.355 kilómetru no luan metru 25, ninia konstrusaun sei halo iha faze haat; faze dahuluk hosi Suai ba Fatukai, faze daruak hosi Fatukai ba Betano, faze datoluk hosi Betano ba Natarbora no faze daikus hosi Natarbora ba Beacu. Hanesan responsavél ba implementasaun projetu ne’e ha’u bele dehan katak iha tinan 2017 projetu ne’e hotu ona”.

Iha fatin hanesan Ministru Pertóleu no Rekursu Miniarál, Alfredo Pires hateten, “implementasaun projetu Auto-Estrada ne’e sei la hasoru  defikuldade  tanba ami mós ezije atu buat hotu tenke hala’o iha koordenasaun ida ne’ebé di’ak. Hosi parte petróleu nian ami estuda hela kona-ba nesesidade, liuliu kona-ba estrada ida atu liga projetu tasi mane, ami nia parte mós  hatene ona auto estrada ne’e atu liga hosi parte ne’ebé no to’o iha ne’ebé, agora tenke entrega ba Ministru Obras Públikas ne’ebé responsavél ba estrada hotu-hotu iha rai laran no ita tenke la’o hamutuk iha liña koordenasaun ida”.

Alfredo Pires esplika tán katak, “auto-estrada ne’e importante tanba mai hosi esforsu Timor-Leste sira nia matenek. Ita iha mós objetivu liuliu iha poténsia agrikultura nian, iha kosta-sul ne’ebé nia rai bokur, luan no tetuk. Ita sei iha oportunidade atu aprende hosi nasaun seluk oinsá mak infraestruturas la’o ho poténsia mina nian, bainhira ita iha infraestutura di’ak ida iha kosta sul benefísiu barak sei mosu iha ne’ebá”.