Segunda-feira, loron 21  fulan Janeiru tinan 2013, reprezentante Governu Timor-Leste nian simu sasán sira hosi reprezentante sira UNMIT nian iha serimónia ida ne’ebé hala’o iha Kompleksu II, Obrigado Barracks.

Reprezentante UNMIT nian, Tom Soyer, nu’udar Xefe Servisu Informasaun no Komunikasaun, informa iha okaziaun ne’e  katak, entrega sasán UNMIT nian ba Governu Timor-Leste, la’ós  ekipamentu sira de’it maibé hamutuk ho parte infra-estrutura ida (Kompleksu II Obrigado Barracks nian no mobiliáriu sira). Ekipamentu hirak ne’e mak hanesan veíkulu 74, komputadór 223 no jeradór 2.

Diretór Jerál Ministériu Finansas, António Freitas, nu’udar reprezentante hosi Governu hateten katak, Diresaun Patrimóniu Estadu identifika ona ekipamentu sira no infra-estrutura hirak ne’e no nia afirma katak sasán hirak ne’e iha kondisaun di’ak, liliu veíkulu sira ne’ebé seidauk uza liu tinan-tolu, nu’udar ezijénsia Governu nian.

Freitas, mós, hatan ba jornalista sira katak, Governu diside ona la presiza tan veíkulu foun sira iha tinan 2013, tanba prepara ona orsamentu montante balu atubele halo manutensaun ba viatura sira, inklui sira ne’ebé mak UNMIT fó.

Distribuisaun no uza sasán hirak ne’e, inklui viatura sira, ba instituisaun Governamentál sira, depende hosi desizaun Governu nian, liuhosi Ministériu Finansa ne’ebé prezide Komisaun Aktu Entrega nian.

Marka prezensa iha eventu ne’e, aleinde Tom Soyer hosi UNMIT no António Freitas hosi parte Governu nian, iha mós funsionáriu UNMIT sira seluk, Diretór Nasionál sira, Diretora Servisu Patrimóniu Estadu, Diretór Reseita Petrolífera no Diretór Reseita Doméstika.