Ministériu Saúde, tersa-feira semana ne’e, loron 22, fulan Janeiru, hetan doasaun kareta ambulánsia neen hosi Governu Xina liuhosi Embaixadór Xina nian iha Díli. Objetivu hosi apoiu ne’e atu hametin relasaun nasaun rua ne’e nian nomós atu fasilita servisu asisténsia saúde, liu-liu ba komunidade sira ne’ebé hela iha área rurál.

Ministru Saúde, Sérgio Lobo, agradese ba Governu Xina liuhosi Embaixadór, Tian Guangfeng ba doasaun kareta ambulánsia ne’e. Tuir planu ministériu nian, ambulánsia sira ne’e sei entrega ba distritu sira, liu-liu klínika sentru saúde sira ne’ebé iha área remota sira.

Tian Guangfeng informa mós katak” Governu Xina senti orgullu bele ajuda kareta ambulánsia ba povu Timor-Leste, ne’ebé sei falta ambulánsia hodi atende pasiente sira ne’ebé transfere hosi área remota sira mai ospitál nasionál. Governu Xina mós sei kontinua fó apoiu ba povu timorense la’ós de’it ba setór saúde, maibé mós iha seitór ekonomia, agrikultura no sel-seluk tán”.