Governu liuhosi Sekretáriu Estadu ba Polítika kona-ba Formasaun Profisionál no Empregu, Ilídio Ximenes da Costa, ho reprezentante Igreja Bispo Dioseze Baukau Dom Basílio do Nascimento, hala’o inaugurasaun ba ponte Tara iha sub-distritu Soibada, distritu Manatutu, loron 20, fulan Janeiru, tinan 2013.

Ilídio Ximenes da Costa, hateten katak ho inaugurasaun ponte Tara ne’e bele fasilita populasaun sira iha sub-distritu Soibada. Ponte Tara ne’e nu’udar programa hosi Sekretária Estadu ba Polítika kona-ba Formasaun Profisionál no Empregu (SEPFOPE), liuhosi programa empregu rurál osan dolár tolu ho Bridges to Prosperity.

Ponte Tara ne’e hahú konstrusaun iha fulan Outubru, tinan 2012. Prosesu obra ne’e envolve servisu na’in hamutuk ema 120. Projetu ponte Tara ne’e halo tamba hala’o servisu hamutuk entre Bridges to Prosperity mak fó tulun materiál no SEPFOPE ajuda fasilita osan liuhusi programa empregu rurál. Ponte ne’e ninia medida, naruk metru 160 no luan metru 13.

Partisipa iha serimónia inaugurasaun ne’e Amu Bispo Dioseze Baukau, Dom Basílio do Nascimento, Sekretáriu Estadu ba Polítika kona-ba Formasaun Profisionál no Emprego, Ilídio Ximenes da Costa,  autoridade lokál no mós komunidade sira.