……………………………………………………………………………………………………………..
Díli, Loron 16 Fulan Janeiru Tinan 2013
Komunikadu Imprensa
Sorumutu Konsellu Ministru loron 16 fulan Janeiru tinan 2013
Governu Konstitusionál V hala’o sorumutu iha kuarta-feira loron 16 fulan Janeiru tinan 2013, iha sala sorumutu Konsellu Ministru nian, iha Palásiu Governu, iha Dili no aprova ona:
1. Dekretu-Lei ne’ebé mak aprova Orgánika Ministériu Saúde nian
Diploma ida ne’e estabelese Orgánika Ministériu Saúde nian, hodi kumpre Dekretu-Lei no 41/2012, loron 7 fulan Setembru, ne’ebé mak aprova Orgánika Governu Konstitusionál V no Programa Governu Konstitusionál V Repúblika Demokrátika Timor-Leste nian.
Orgánika Ministériu Saúde nian adapta tuir realidade foun Ministériu nian atubele hasa’e nível prestasaun kuidadu saúde nian sira no atu responde di’ak liután ba ejijénsia sira setór ne’e nian.
2. Dekretu-Lei ne’ebé mak aprova Lei-Orgánika Ministériu Justisa nian
Tuir Lei Orgánika Governu Konstitusionál V (Dekretu-Lei no 41/2012, loron 7 fulan Setembru) Ministériu Justisa aprezenta ona ba Konsellu Ministru estrutura servisu no organizmu foun Ministértiu nian, atu garante kumprimentu programa Governu nian ba área Direitu no Justisa.
Nune’e, Lei Orgánika hosi Ministériu Justisa reflete duni aposta estruturante Governu Konstitusionál V nian iha melloria kualidade, iha funsionamentu di’ak no iha efisiénsia servisu no estrutura Administrasaun Públika nian, hahú ba aperfeisoamentu no reorganizasaun ninia servisu no organizmu sira, ho intensaun atu bele halo sira sai efisiente no rasionál liután iha utilizasaun rekursu sira no atu optimiza ninia funsionamentu hodi hala’o atribuisaun importante sira ne’ebé mak nia tenke asegura.
Konsellu Ministru analiza mós:
1. Aprezentasaun kona-ba Kriasaun Ajénsia Kooperasaun Timor-Leste, AKT-L
Kriasaun Ajénsia Kooperasaun Timor-Leste, AKT-L ninia objetivu mak atu dezenvolve ajuda esterna ne’ebé fó ba nasaun sira iha faze dezenvolvimentu nian liuhusi asaun hirak ne’ebé dirije espesialmente ba área kooperasaun téknika nian.
2. Aprezentasaun Programa kona-ba “Zona Espesiál Ekonomia Sosiál Merkadu” iha Oe-Cusse Ambeno
Konsellu Ministru analiza ona proposta kona-ba kriasaun “Zona Espesiál Ekonomia Sosiál Merkadu”. Ne’e mak projetu-pilotu ida ne’ebé sei implementa iha Oe-cusse Ambeno, ho objetivu atu proporsiona ba distritu ida ne’e perspetiva foun ida kona-ba futuru, liu-liu kona-ba dezenvolvimentu ekonómiku, pás no estabilidade nian.
Atu fó hanoin katak n.u 3 husi art. 5u Konstituisaun Repúblika Demokrátika Timor-Leste nian prevee katak Oe-cusse Ambeno hetan tratamentu administrativu no ekonómiku espesiál.