Sorumutu Konsellu Ministru nian iha loron 19 Dezembru 2012
Prezidénsia Konsellu Ministrus
V Governu Konstitusionál
.............................................................................................................................
Díli, Loron 19 Fulan Dezembru Tinan 2012
Komunikadu Imprensa
Sorumutu Konsellu Ministru nian iha loron 19 Dezembru 2012
Governu Konstitusionál da-V, hala’o sorumutu iha Kuarta-feira, Loron 19 fulan Dezembru, tinan 2012 iha Sala Formasaun Ministériu Finansas nian, iha Dili, no aprova ona:
1. Rezolusaun Governu ne’ebé aprova renovasaun kona-ba suspensaun ba prátika atividade hosi klibur Arte Marsiál sira
Diploma ida ne’e hafoun fali Rezolusaun Governu nian nu. 35/2011, Loron 23, fulan Dezembru, ne’ebé suspende autorizasaun ba prátika atividade hotu-hotu hosi klibur Arte Marsiál sira nian durante tinan ida nia laran.
Renovasaun ba suspensaun ida ne’e hala’o tamba iha ema sidadaun balu seidauk iha konsiénsia ne’ebé, liuhosi Klibur Arte Marsiál sira, bele hamosu distúrbiu, violénsia no krime sira, liu-liu iha Dili, no mós iha distritu sira.
Desizaun ida ne’e mós mosu tanba iha faktu ne’ebé hatudu katak iha rai-li’ur, hanesan Indonézia (iha Bali, Yogyakarta no Surabaya) mosu mos distúrbiu no hahalok violénsia entre klibur foin-sa’e estudante timor-oan sira.
Tanba ne’e mak Konsellu Ministru deside atu hanaruk tan prazu suspensaun nian ba hala’o atividade hosi arte marsiál sira ba tinan ida nia laran.
Konsellu Ministru mós analiza ona:
1. Taka Tinan Finanseiru 2012 nian
Governu hamutuk ho diretór sira hosi área finansa nian hosi ministériu oin-oin halo tiha ona análize hodi taka tinan finanseiru 2012, no mós nesesidade atu hala’o lalais pagamentu ba despeza hirak ne’ebé tama ona iha programa ba Tinan ida ne’e nian.
