Esbosu Lei Komunikasaun Sosiál hahú fahe ba Asosiasaun Jornalista, Diretór Média no Nain ba Média Sira
Sekretáriu Estadu Komunikasaun sosiál, Nelio Isaac Sarmento, halo distribuisaun esbosu lei komunikasaun sosiál nian ba na’in ba Média, Diretór media sira no Asosiasaun Jornalista sira, hafoin aprezenta no halo tiha diskusaun ida ne’ebé hala’o iha Tibar Beach Retreat, iha loron 17 fulan Dezembru tinan 2012.
“Prosesu elaborasaun esbosu lei komunikasaun sosiál konsidera hanesan prosesu ida ne’ebé demokratiku tebe-tebes, tanba hetan partisipasaun másimu hosi órgaun komunikasaun sosiál sira ne’ebé eziste iha Timor-Leste. Prosesu ne’e hahú kedas hosi mandatu IV Governu Konstitusionál, iha ne’ebé Jornalista sira delega sira nia reprezentante nain lima (Team 5) hodi servisu hamutuk ho jurista sira Governu nian atu elabora esbosu lei jerál ba meiu Komunikasaun sosiál Timor-Leste nian. Prosesu ne’e kontinua to’o mai iha mandatu V Governu Konstitusionál nian no finaliza iha loron 12 fulan Dezembru 2012”, Hateten Sekretáriu Estadu.
Nélio Isaac esplika katak, “tanba konsidera prosesu ne’e, prosesu demokratiku ida, mak ohin loron ita hasoru malu ho objetivu atu haluan tan diskusaun, la’os de’it ho team 5 ne’ebé hetan fiar hosi jornalista sira maibé hakarak husu mós hanoin balun hosi ita boot sira nu’udar Diretór media, Asosiasaun Jornalista sira nian no proprietáriu Média nian, atu nune’e iha futuru ita bele iha lei ida ne’ebé ho kualidade.
Hafoin aprezentasaun no diskusaun kona-ba esbosu lei ne’e, gabinete Sekretáriu Estadu Komunikasaun Sosiál hahú halo distribuisaun esbosu lei ne’e ba partisipante sira hodi estuda durante loron 30 nia laran, hafoin bele hetan fali feadback hosi sira iha loron 21 fulan Janeiru 2012, molok halo semináriu internasionál ho prezensa peritu internasionál sira.
