Lansamentu Programa “Kuda Bambuu”
Primeira Dama Isabel da Costa Fereira, loron 18 fulan Dezembru halo lansamentu kuda bambuu, iha Suku Estadu, Sub-Distritu Ermera, Distritu Ermera, programa kuda bambuu ne’e organiza hosi Sekretária Estadu ba Apoiu no Promosaun Setór Privadu (SEAPRI), hafoin kuda tiha bambuu, Primeira dama husu ba instituisaun Estadu nian hotu atu halo kampaña hodi promove kuda bambuu, nune’e povu tomak bele fó importánsia ba kuda bambuu hodi ajuda ekonomia família nian. Programa ne’e diak, tan ne’e, bele habelar to’o iha Distritu sira hotu, deklara Primeira Dama Isabel Fereira.
Programa kuda bambuu iha objetivu ne’ebé bo’ot hanesan tahan rai halai ka erozaun no bele mós halo mobiliáriu ba iha família nia laran, hodi hamenus dependénsia ba importasaun hosi rai-liur no mós labele depende liubá iha osan mina rai nian ne’ebé sai hanesan rikusoin, maibé mós iha rikusoin seluk hanesan bambuu, aleinde ne’e Timor-Leste mós bele sai esportadór bambuu ba iha rai liur hanesan Xina no India.
Sekretária Estadu ba Apoiu no Promosaun Setór Privadu (SEAPRI) Veneranda Lemos, liuhosi mensajen ba komunidade Suku Estadu hateten katak, kuda bambuu ne’e sei lori benefisiu ba povu tanba iha tinan haat nia laran de’it bele halo ona kolleta hodi fornese ba iha sentru bambuu Tibar atu sosa hodi halo produsaun. Governu iha ona planu atu kuda tan bambu hamutuk rihun sanulu resin sia, iha Timor laran tomak.
Felisberto dos Santos nu’udar agrikultór Distritu Ermera hateten katak, programa kuda bambuu iha tempu ukun rasik an ne’e importante tebe-tebes no fó duni benefisiu ba família sira, tanba sentru bambuu Tibar prontu atu sosa bambu hodi prodús mobiliáriu sira ba iha família.
Marka prezensa iha lansamentu kuda bambuu ne’e maka hanesan, Primeira Dama, Isabel da Costa Fereira, Sekretária Estadu ba Apoiu no Promosaun Setór Privadu, Veneranda Lemos, Sekretáriu Estadu Komunikasaun Sosiál (SEKoS), Nélio Isaac Sarmento, sekretáriu Estadu Florestas, João Cardoso Fernandes, Sekretáriu Estadu Meiu Ambiente Numinando Soares Martins, Sekretáriu Estadu Seguransa Sosiál, Vitor da Costa, Governu Lokál, lider komunitáriu no lia nain sira.
