Sekretáriu-Jerál Asosiasaun Nasoens  Sudeste Aziátiku nian (ASEAN), Dr. Surin Pitsuwan, hala’o vizita ofisiál ba loron tolu iha Timor-Leste, hahú iha loron 4 to’o loron 6 fulan Dezembru tinan 2012, tuir konvite husi Governu timoroan nian.

Sekretáriu-Jerál ASEAN bainhira to’o  iha  loron  ne’e, Ministru José Luís Guterres simu iha Ministériu Negósiu Estranjeiru no Kooperasaun, ne’ebé hala’o ho jantar ofisiál ida.

Loron vizita ba daruk nian-ne’e, Dr. Surin Pitsuwan hala’o sorumutu ho Prezidente Repúblika, Taur Matan Ruak, no mós Primeiru-Ministru, Kay Rala Xanana Gusmão, iha fatin sorumutu Konsellu Ministrus nian. Sekretáriu-Jerál ASEAN garante ba Ezekutivu katak Timor-Leste nia integrasaun ba iha organizasaun ne’e hetan konsiderasaun séria tebe-tebes”. Fó hanoin katak Timor-Leste submete tiha ona ninia kandidatura iha fulan Fevereiru tinan 2011 no hetan admisaun iha fulan Novembru tinan ne’e duni, durante konferénsia xefe Estadu no Governu ASEAN-nian ne’ebé, hala’o iha Bali.

Molok fila-fali husi Timor-Leste, iha loron 6 fulan Dezembru, Dr. Surin Pitsuwan sei vizita Kristu Rei no Muzeu Nasionál Rezisténsia Timoroan nian.

Fó  hanoin katak, ASEAN harii iha fulan Agostu tinan 1967, ho objetivu boot atu aselera lalais kresimentu ekonómiku, progresu sosiál no dezenvolvimentu kulturál Estadu membru sira no protesaun pás no estabilidade iha rejiaun sudeste aziátiku.

Estadu membru sira ASEAN hamutuk: Indonézia, Malázia, Filipina, Singapura, Tailándia, Brunei, Birmánia, Kamboja, Laos no Vietname.