Ministru Estadu no Prezidénsia Konsellu Ministru no
Porta-Vóz Ofisiál Governu Timor-Leste
Díli, Loron 20 Fulan Dezembru Tinan 2012
Komunikasaun Sosiál enkoraja atu regula an rasik hodi asegura prátika internasonál ho di’ak
Atu adere ba komemorasaun ba loron Internasionál Dereitu Umanu nian, iha semana kotuk, ne’ebé importante tebes ba Timor-Leste atu reflete kona-ba liberdade ba imprensa, hodi fó atensaun liu ba devér no dereitu atu informa no hetan informasaun.
Komunikasaun sosiál, iha Timor-Leste konsidera hanesan sanak Estadu nian da-limak. Liberdade ba imprensa no komunikasaun sosiál hanesan parte importante ida hodi harii demokrasia, promosaun no protesaun ba ambiente informativu ida, ne’ebé justu, independente hanesan aspetu importante ida ba konstrusaun nasaun nian.
Bainhira selebra Aniversáriu Restaurasaun Independénsia ba 10o, Timor-Leste konsidera katak, iha aspetu barak maka Timor-Leste sei nasaun nurak hela. Komunikasaun sosiál, nune’e mós iha instituisaun hotu-hotu, ajénsia no sanak ba Estadu nian, hala’o dezenvolvimentu ho regulamentasaun ne’ebé sei iha hela prosesu konsulta no análize entre líder sira setór privadu nian no partisipante sira.Tenke kumpri prátika ruma ne’ebé di’ak tuir norma internasionál sira hodi promove integridade ba meiu komunikaksaun sosiál, liliu durante períodu krítiku konstrusaun Estadu ne’e nian.
Norma internasionál sira garante separasaun entre publi-reportájen, publisidade ne’ebé hetan selu maibé publika ho karaterístika formál repotajen nian, no liberdade editoriál ne’ebé sai hanesan konteúdu eskritu jornál nian, tuir independénsia no enkuadramentu étiku-normativu ne’ebé prezide ba ezersísisu jornalizmu nian. Ema ida labele halo buat rua. Kria separasaun ida proteje komunikasaun sosiál, sidadaun sira husi konflitu interese oioin ka potensiál abuzu podér nian. Abuzu podér bele envolve ema ka organizasaun ne’ebé selu ba elaborasaun editorál ne’ebé favorável, maske halo pagamentu tuir meiu legál”kustu ba publisidade nian”.
Situasaun oinseluk mós bele sai hanesan de’it, bainhira sira ne’ebé maka lakohi selu publisidade bele sai hanesan objetu kampaña ne’ebé agresivu no naruk husi komunikasaun sosiál. Atu separa publi-reportajen husi liberdade editoriál, sira ne’ebé maka hakerek laiha relasaun ho transasaun finanseira kona-ba publisidade, tan ne’e laiha alvu ba prekonseitu iha elaborasaun editoriál.
Hanesan iha kualkér empreza ka organizasaun, transasaun finanseira tenkesér transparente atu garante katak laiha partidu ida, organizasaun ka indivídu maka halo hela kontribuisaun finanseira ne’ebé la tuir lei atu elabora ajenda espesífiku ida iha komunikasaun sosiál, favorável ka halo haat.
Boa governasaun implika katak laiha ema ida, organizasaun, Instituisaun Estadu nian, ka membru instituisaun nian atu bele interfere ka halo tauk kualkér jornalista ka meiu komunikasaun kona-ba konteúdu, jornalizmu investigasaun nian ka editoriál nian. Ida-ne’e impede liberdade imprensa no sobu papél komunikasaun sosiál independente ida nian.
Importante tebes atu meiu komunikasaun sosiál iha Timor-Leste fó informasaun no hanorin, ho kuidadu no dedikasaun, povu ita nia nasaun nian ho reprezentasaun loloos, imparsiál no labele tendensiozu ho lei no regulamentu ita-nian, bainhira refere ba Konstituisaun.
Ministru Estadu, Agio Pereira, konsidera katak, “ ita tenke iha orgullu ba avansu iha ita-ninia setór komunikasaun sosiál no ba mane no feto sira ne’ebé maka pertense ba komunikasaun sosiál ne’e. Sira hala’o sira nia kna’ar iha klima ida livre no justu, ne’ebé hetan apoiu hosi lei sira ne’ebé proteje sira ninia servisu no liberdade imprensa nian. Nu’udar país foun ida, ita tenke kontinua hatudu prátika internasionál sira ne’ebé di’ak iha setór hotu-hotu atu avansa ho ita-ninia perkursu dezenvolvimentu nian no garante rezultadu sira justu no hanesan ba sidadaun hotu-hotu”. FIM