Dekanu Universidade Nasionál Timor Lorosa’e, Martinho Pereira, hala’o serimónia abertura, iha loron-kuarta, loron 4 fulan Dezembru tinan 2012, halo sai públiku ba kandidatura sira ba vaga 84 ne’ebé disponivel ba estájiu iha área komunikasaun sosiál nian.

Estájiu ne’e nu’udar rezultadu hosi parseria entre Sekretaria Estadu Komunikasaun Sosiál (SEKOMS), Departamentu Komunikasaun Sosiál Universidade Nasionál Timor Lorosa’e (UNTL) nian no Sentru Formasaun Téknika iha Komunikasaun (SEFTEK), ne’ebé hetan apoiu hosi Sekretaria Estadu ba Apoiu no Promosaun Setór Privadu no IADE.

Ba alunu sira ne’ebé hakarak kandidata an, iha ona vaga 84 ne’ebé maka fahe ba tipu estájiu rua: estájiu kurrikulár ho vaga 44, no estájiu profisionál ho vaga 40.

Estájiu kurrikulár iha ninia durasaun fulan ida no alunu sira tinan 3^o maka bele kandidata an ba. Nomós, estájiu profisionál hala’o ba alunu finalista sira tinan 4^o nian no ninia durasaun maka fulan rua. Estájiu sira ne’e sei hetan osan hanesan subsídiu ba transporte no alimentasaun hosi empreza ne’ebé simu estajiáriu sira.

Abertura sei prevee ba fulan Fevereiru tinan 2013. Ne’ebé, to’o loron 25 fulan Janeiru tinan 2013, alunu interesadu sira bele submete sira-nia kandidatura ba estájiu no empreza setór privadu no instituisaun públika sira ne’ebé hakarak apoia programa ida ne’e bele mós prienxe formuláriu ne’ebé maka disponivel iha ne’e no entrega ba SEFTEK ka Departamentu Komunikasaun Sosiál UNTL nian.

Estájiu ne’e sei hala’o iha área sira maka hanesan tuirmai: rádiu, televizaun, imprensa eskrita, jornalizmu dijitál, relasaun públika, publisidade, marketing no relasaun internasionál sira.