Governu liuhosi Vise Primeiru-Ministru, Fernando La Sama de Araújo, akompaña hosi Sekretáriu Estadu Eletrisidade, Januário Pereira, inaugura sub-estasaun elétrika Kasa subdistritu Ainaru, distritu Ainaru iha loron 26 fulan Novembru tinan 2012.

Vise Primeiru-Ministru, Fernando La Sama de Araújo, iha ninia diskursu hatete “nu’udar Ainaru oan, ha’u sente orgullu no kontente tanba Ainaru bele hetan ona eletrisidade to’o oras rua-nulu-resin-haat. Ha’u hakarak apelu ba komunidade Ainaru atu uza eletrisidade ho kuidadu, no tenke hamate ahi bainhira la presiza para labele gasta enerjia elétrika”.

Sekretáriu Estadu Eletrisidade, Januário Pereira, hatutan tan, “ohin ita inaugura sub-estasaun Elétrika Kasa nune’e kompleta ona 8, sei falta sub-estasaun elétrika Suai. Tuir planu sei estabelese sub-estasaun 9 iha territóriu nia laran tomak”.

Iha biban ne’e, Administradór distritu Ainaru, Manuel Ramos Pinto, rekomenda ba Sekretáriu Estadu Eletrisidade, atu estabelese mós liña eletrisidade ba suku no aldeia sira distritu Ainaru nian ne’ebé maka seidauk hetan fornesimentu enerjia elétrika, iha tinan 2013.

Marka Prezensa iha serimónia inagurasaun sub-estasaun elétrika Kasa, Vise Primeiru-Ministru, Fernando La Sama de Araújo, Vise Ministru Komérsiu, Indústria no Ambiente, Abel Ximenes, Sekretáriu Estadu Eletrisidade, Januário Pereira, Sekretáriu Estadu Água Saneamentu no Urbanizasaun, Elias Pereira Moniz, Administradór hosi distritu Ainaru, Baukau, Lautein no komunidade hotu.