………………………………………………………………………………………………………….
Díli, Loron 23 Fulan Novembru Tinan 2012
Komunikadu Imprensa
Toleránsia Pontu iha loron 27 no 29 fulan Novembru tinan 2012
Governu Konstitusionál V Timor-Leste nian deside atuhodi fó toleránsia pontu iha loron 27 no 29 fulan Novembru tinan 2012 ba funsionáriu no ajente ministériu hotu-hotu ka servisu ne’ebé dependente ba sira, nomós institutu no organizmu sira ne’ebé integra iha administrasaun indireta Estadu nian.
Desizaun ida ne’e bazeia ba Lei n.o 10/2005, loron 10 fulan Agostu, ne’ebé determina loron ne’ebé mak feriadu nasionál, data komemorativa no toleránsia pontu nian. Entre feriadu nasionál sira ne’ebé nia loron fiksa ona, mak loron 28 fulan Novembru hanesan Loron Proklamasaun ba Independénsia, ne’ebé iha tinan ida ne’e hala’o mós Sentanáriu Revolta Dom Boaventura nian (tinan 1912 – 2012), ne’ebé mak sei realiza iha Same, distritu Manufahi.
Artigu 3.º iha Lei no. 10/2005, determina katak devér síviku ba sidadaun hotu-hotu, liliu ba estudante sira no funsionáriu no ajente Estadu sira nian, hodi partisipa iha festa no serimónia komemorativa ba loron Proklamasaun Independénsia nian, ne’ebé sei hala’o iha servisu públiku sira ka estabelesimentu ensinu, públiku ka privadu sira.
Nune’e, atu populasaun sira bele mai partisipa iha festa hirak ne’ebé mak sei hala’o hodi komemora Sentanáriu ne’e no hodi bele desloka ba distritu Manufahi, Governu hanoin atu fasilita deslokasaun ne’e hodi fó toleránsia pontu iha loron 27 no loron 29 fulan Novembru tinan 2012.