Sorumutu estraordináriu Konsellu Ministru loron 20 fulan Novembru tinan 2012
Prezidénsia Konsellu Ministrus
V Governu Konstitusionál
.........................................................................................................................
Díli, Loron 20 Fulan Novembru Tinan 2012
Komunikadu Imprensa
Sorumutu estraordináriu Konsellu Ministru loron 20 fulan Novembru tinan 2012
Konsellu Ministru hala’o sorumutu estraordináriu iha tersa-feira ne’e, loron 20 fulan Novembru tinan 2012, iha sala formasaun Ministériu Finansa nian, iha Díli, no aprova ona:
1. Rezolusaun Governu ne’ebé aprova atribuisaun ajuda finanseira ba vítima sira husi furakaun Sandy, iha Haiti
Tuir deklarasaun estadu emerjénsia no apelu ba ajuda internasionál Governu Haiti nian tanba anin furakaun Sandy ne’ebé liu no udan boot ne’ebé halo estragu sira iha país nian, hodi halo buat lubuk mak aat, ema barak mate no sasan sira lakon, tanba ne’e, V Governu Konstitusionál Timor-Leste nian, deside tulun osan dólar millaun ida hodi fó asisténsia umanitária ba populasaun ne’ebé mak afetadu.
Maizumenus millaun rua haitianu sira mak funu hasoru inseguransa alimentár no falta infra-estrutura bázika sira. Inundasaun ne’ebé maka’as aumenta liután rizku iha epidemia kólera foun ida hahú husi fulan Outubru tinan 2010 ne’ebé hamate ema maizumenus rihun ualu no rihun neen hirak seluk mak afetadu.
Hanoin hikas fali Haiti ne’ebé mak sai vítima tanba rai nakadoko maka’as iha tinan 2010 hodi hetan ajuda internasionál ne’ebé Timor-Leste mós hola parte.
Korajen no dignidade ne’ebé povu Haiti hatudu liuhusi dezastre naturál hirak ne’ebé mak nia nu’udar vítima ne’e, hanesan ezemplu ida ba Mundu no atu reforsa liután nesesidade iha kooperasaun internasionál ida ne’ebé forte no efektiva.
2. Orsamentu Jerál Estadu Tinan 2013
Konsellu Ministru analiza no diskuti ona kona-ba rezultadu relatóriu sira sorumutu téknika no sorumutu polítika Komisaun Revizaun Orsamentu Jerál Estadu (OGE) ba tinan finanseiru 2013 nian, ne’ebé aprova ona montante globál hodi atribui ba ministériu idak-idak iha tinan oin mai.
