Timor-Leste komemora 12 Novembru, loron Masakre Santa Cruz nian ba 21 no tinan 20 aniversáriu Misaun Paz iha Timor, Lusitânia Expresso, iha Díli. Komemorasaun ne’e hahú ho misa iha Igreja Motael, Díli, hafoin halo lao-ain hosi Igreja Motael ba Semiteiru Santa Cruz hodi fó homenajen ba herois 12 Novembru nian.

Vise Primeiru Ministru, Fernando La Sama de Araújo, iha ninia diskursu hateten katak “Ita sira ne’ebé ohin sei moris, deve hela ba sira ne’ebé maka mate tiha ona, ne’ebé lori ran no ruin sosa ukun rasik an ida ne’e, ne’e duni, ita iha obrigasaun atu hakas an hodi realiza mehi ne’ebé sira iha ba nasaun ida ne’e, sira-nia mehi maka moris hakmatek no dezenvolvimentu ba povu Timor-Leste”.

Iha fatin hanesan, Prezidente Komité 12 Novembru, Gregório Saldanha, hato ninia deklarasaun iha komemorasaun 12 Novembru ne’e, hodi ezije ba Organizasaun Nasoins Unidas no komunidade internasionál tenke asegura responsabilidade ba krime grave ne’ebé maka militar Indonézia sira komete durante iha okupasaun hahú hosi 1975-1999 tenki hasoru justisa, tanba justisa maka dalan úniku hodi hakotu impunidade iha Timor-Leste ho Indonezia.

Komemorasaun tinan ida ne’e, hala’o ho atividade oioin, hanesan, expozisaun iha Arquivu no Museu Resisténsia Timor-oan nian, Apresentasaun teatru aluziva ida, kona-ba Masakre Santa Cruz, iha Jináziu Díli, konferensia loron rua iha salaun nobre Ministériu Negosiu Estranjeiru no Kooperasaun, ho tema, “Timor, Solidadriedade Internasionál No Futuru, Tinan 20 Aniversáriu Lusitânia Expresso No Komemorasaun 12 Novembru” no “Reasaun no Solidariedade Internasionál, Misaun Paz nian iha Timor, Lusitânia Expresso” (iha loron 13 Novembru).

Partisipa iha komemorasaun ne’e maka, Prezidente Parlamentu Nasionál Vicente Guterres, Prezidente Tribunál Rekursu Claúdio Ximenes, Vise Primeiru Ministru, Fernando La Sama de Araújo, eis Titulares, membru Governu, Grupu Misaun Paz nian mai Timor, Lusitánia Espreso, Jornalista Revista Tempo – Indonézia nian Dewi Anggaraeni  no familia vitima 12 Novembru sira hotu.